Палынем ыле, йот элла гыч пӧртылшӧ-влакым у коронавирус инфекциян лийын кертмышт шотышто тергат мо?
О.Глушкова
Йошкар-Ола
Йодышлан Роспотребнадзорын Марий Элысе виктемжын пресс-службыштыжо тыге вашештеныт:
– Виктемысе мониторингын ончыктымыж почеш, йот элла дене авиасообщений-влакым угыч ыштыме деч вара Марий Элыш 6837 граждан пӧртылын. Ты чот гыч 6234 еҥ анкетированийым Кугыжаныш услугын единый порталыштыже эртен. 6521 еҥ СOVID-19 дене черланен кертме шотышто ПЦР йӧн дене йот эл гыч пӧртылмӧ деч вара кум кече жапыште шымлалтын.
Анализым 50 еҥ: 36 кугыеҥ да 14 йоча, – сдатлен огыл. Йот эл гыч пӧртылмеке, кум кече эртыме деч вара 33 граждан: 28 кугыеҥ да 5 икшыве, – тестироватлалтын.
Кок йоча дене кылдалтше документым правам аралыме органыш пуымо, молан манаш гын нуным тестироватлыме результат шотышто кокытеланымаш лектын. Моло гражданым Роспотребнадзорын виктемышкыже ӱжыктымӧ, нунын РФ тӱҥ санитарный врачын 2020 ий 27 июльышто лукмо пунчалжым пудыртымышт шотышто протоколым возымо. 31 март йотке судыш 58 материалым ончаш колтымо. Судын пунчалже почеш 55 еҥлан штрафым пуымо, тудын чумыр суммыжо 457500 теҥгеш шуын.
Правам аралыме органыш йот элла гыч Марий Элыш пӧртылшӧ 190 граждан шотыштат уверым пуымо – нунын чынже дене кушто илымышт да тазалыкышт шотышто нигуштат нимогай увер уке.
Йот элла гыч пӧртылшӧ граждан-влак коклаште 17 кугыеҥын да 1 йочан COVID-19 дене инфицироватлалтмыштым рашемдыме. Тиде факт шотышто эпидемий ваштареш виктаралтше мероприятийым тичмашнек эртарыме.
М.ИВАНОВА
