Марий Элын ончычсо вуйлатышыже Леонид Маркелов СИЗО-што теле марте шинчаш тӱҥалеш.
Москвасе Басманный суд кодшо шочмын тыгай пунчалым луктын – тудо декабрь тӱҥалтыш марте петырымаште лиеш.
Суд следовательын Маркеловым эше кум тылзылан, 12 декабрь марте, изоляторышто кучаш йодмашан ходатайствыжым шотыш налын да йодмыжым шуктен. А тудым аралыше-влакын вес мерым, СИЗО дене кылдалтшым огыл, ышташ йодмыштым суд шуктен огыл.
Тиде делан вес фигурантше Наталья Кожановамат суд 12 декабрь мартеак СИЗО-што кодаш пунчалын.
Бизнесъеҥ Николай Кривашым взяткым налмыжлан титаклыме нерген заочно увертареныт. Тудым тӱнямбал розыскыш увертареныт.
Л.Камалетдинова.