Шукерте огыл «Таир» каныме базыште «Студент лидер – 2021» Россий конкурсын республикысе этапше эртен. Таҥасымашке Юл кундем кугыжаныш технологий да Марий кугыжаныш университетла гыч кандаш участник ушнен.
Икымше верыш «Юлтех» студент профсоюз организацийын председательым алмаштыше Никита Ульянкин лектын. Кокымшо верым ты вуз гычак ӱдыр, профбюрон еҥже Екатерина Дождикова налын. Кумшо верым «Юлтех» профкомышто тыршыше ӱдыр Наиля Марасанова ден МарГУ-со профбюро председатель Анастасия Дуюнова пайленыт.
«2019 ийыште ты конкурсыш икымше гана ушненам. Тунам куд эн тале студент радамыште лийынам.
Шке профсоюз да университетын чапшым аралаш пиал. Республикыште веле огыл, Россий кӱкшытыштат ончыко лекме шуэш. Эн тале ӱдыр-рвезе-влак мемнан кундемыште тунемыт. Тидын дене чылам палдараш жап толын шуын», – каласыш Н.Ульянкин.
О.МОШКИНА
