Тачысе лаштыкын унаже – Шернур район Нурсола ял гыч Анна Прохорова.
Ӱдыр Шернурысо 1-ше №-ан школышто кандашымше классыште тунемеш. Кумшо классыште сылнымутлан шӱмаҥын.
«Марий йылме дене туныктышем ик почеламут конкурсышко ушнаш темлен. Тушто мыйым кокымшо вер дене палемденыт. Тиде умбакыже таҥасымашлашке ушнаш кумылаҥден. Сочинений возымо денат мастарлыкем тергенам.
Варажым почеламутым сераш тӱҥалынам. Тӱҥалтышлан сайынжак лектын огыл гынат,кумылем волен огыл. Жап гыч ты усталыкем вияҥын. Тыге «Ялем» почеламут «шочын».
Мураш йӧратем. Тӱҥалтыш класслам музыкальный школышто тунемынам. Туныктышем чӱчкыдын солистлан ойырен. Нылымше класс деч вара, тиде аланыште моштымем вияҥдаш манын, кружокыш кошташ тӱҥалынам. Сценышкат шагал огыл лектынам. Икымше мурым возен онченам. «Ава» маналтеш. Семже Вячеслав Осиповын. Вашке тудым калык ончык луктам манын ӱшанем», – палдарыш ӱдыр.
«Ялем»
Эн чот сылне мыйын ялем,
Йӧраталме мотор вер-шӧрем.
Тый денет кугешнен мый илем,
Тыланет чон мурем пӧлеклем.
Шарлен вочшо пасум шергылтен,
Кумыл нӧлтын йоҥга турий сем.
Олык лапым, чодырам легылден
Снегым, мӧрым копашке погем.
Эр лупс дене памаш дек волен,
Ший вӱдеш кап-кылем чывылтем.
Кидым, шӱргым шыман ниялтен,
Вийым налын, кушкеш шулдырем!
Сылне шӱшпык йӱкан ломберем,
Пеледышан, мӱй пушан пистерем…
О, йӧратыме Нурсола ялем,
Курымеш шӱмыштем аралем!
О.МОШКИНА
