Республикысе курчак театр. Гардероб ончылно да залыш пурымаште икшыве-влакын весела йӱк-йӱанышт шоктен, тыгодым тургыжланымыштат шижалтын. Тушто 4 апрельыште «Самырык тукым» республик кӱкшытан конкурс эртаралтын.
Марий тӱвыра рӱдерын эртарыме мероприятийыштыже республикнан 10 районжо да Йошкар-Ола гыч икшыве-шамыч мастарлыкыштым ончыктеныт. Тиде гана конкурс Шочмо элым аралышын идалыкшылан да Кугу Отечественный сарыште сеҥымылан 80 ий теммылан пӧлеклалтын.
Жюри кажне коллективын, посна мурызын мастарлыкшым аклен. Нигӧат пӧлек да сертификат деч посна кодын огыл. Чыланат сай номерым ямдыленыт. Иктышт муреныт, весышт кушталтен-тавалтеныт, кумшышт сар темылан да шочмо кундемлан пӧлеклалтше сылнымут-сем композицийым ончыктеныт.
Тунемше-влакын куштымыштым ончен, мурымыштым колыштын, нунын верч кугешныме кумыл шочын. Илен-толын, нине ӱдыр-рвезе-шамыч сай артист лийын кертыт. Мутлан, Советский район Топкайэҥер кыдалаш школын «Акварель» ден Шернур район Шӱдымарий тӱҥ школын «Кӱдыроҥгыр» ансамбльышт гыч изи артист-влак туге мастарын тавалтеныт, профессионал гаяк кертыч, манаш лиеш. Арам огыл жюри кок коллектившымат икымше вер дене палемден.
«Сылнымут да сем композиций» номинацийыште «Сеҥымаш кече» темылан пӧлеклалтше номер-влак поснак кумылым савыреныт. Йоча-влак сар темым тыге келгын почын кертыт манын шоненат омыл! Южгунам логарыш комыля толын, шинчавӱдат лектын. Звенигово район Кужмарий школын да 1-ше №-ан Морко кыдалаш школын ӱдыр-рвезе-влакын сценкышт уло залым рӱжге кынелаш таратеныт.
«Марий Элем – шӱмбел мландем» темылан пӧлеклалтше номер-влакат ойыртемалтше лийыныт. Кажныштыже йоча-шамыч шочмо кундемым йӧратыме, тудын дене кугешныме нерген ойленыт, шке возымо почеламутымат йоҥгалтареныт.
Шкет мурышо-влак коклаште Н.А.Заболоцкий лӱмеш 2-шо №-ан Шернур кыдалаш школын тунемшыже Злата Васильеван сылне йӱкшӧ молын деч ойыртемалтын. Тудо Шернур районысо сымыктыш школыш коштеш, мурымо усталыкшым шуара. Злата икмыняр конкурсышто ончыл верыш лектын. Шукерте огыл россий кӱкшытан «Школысо шошо» конкурсын регионысо этапыштыже сеҥен. Тудо заочно эртен, а финалже очно Ставропольышто лиеш. Кызыт ӱдыр тудлан кыртмен ямдылалтеш.
– Мый кум ияш гычак мураш тӱҥалынам. Ӱмаште «Ший памаш» конкурсышто мастарлыкем ончыктенам. Тений «Самырык тукымышто» Марий Эл нерген мурым йоҥгалтаренам. Сценыш лекме годым сеҥыме нерген огыл, а муро залыште шинчыше калыкын чонышкыжо шыҥыже манын тыршем, – каласен Злата Васильева.
Мурышо ансамбль-шамыч коклаште Республикысе марий тӱвыра рӱдерын «Изи падыраш» фольклор ден Оршанке район Кугунур кыдалаш школын «Шонанпыл» образцовый йоча фольклор ансамбльышт чаплын муреныт. Кажныже шке ийготан-влак коклаште ойыртемалтын. «Шонанпыл» икмыняр гана сеҥышыш лектын, призовой верым налын.
Мутат уке, йоча-влакын шкеныштым тыге сайын ончыктымыштлан кугу таум туныктышо, музыкальный вуйлатыше-шамычыштлан каласыман. Нунын кажне номерыш чоным пыштен пашам ыштымышт шижалтын.
Лидия ШАБДАРОВА.
Михаил Скобелевын фотожо.
Снимкыште: Звенигово район Кужмарий кыдалаш школын коллективше.
