Кодшо кечылаште онлайн йӧн дене Российысе национальный юниор вӱд конкурс иктешлалтын.
Организатор-влак вӱд поянлыкым аралыме да тудын дене моштен пайдалыныме дене кылдатше эн сай проект-влакым арня наре ойыреныт. Конкурсыш чылаже 76 регион гыч 80 проект пурен.
Сеҥыше-влак радамыш Марий Эл гыч Политехнический лицей-интернатын тунемшыже Дарья Деревягина лектын. Тудо Тӱнямбал номинацийыште ойыртемалтын. Каласен кодыман, Дарья эшежым республикысе йоча экологический рӱерыште шинчымашыжым пойдара. Тудо Марий Турек районышто йоген эртыше Сердяжка эҥер вӱдын вашталт толмыж дене кылдатше шымлымашым эртарен. Ынде ӱдыр Российын чапшым тыгаяк тӱнямбал кӱкшытан конкурсышто аралаш тӱҥалеш. Тудыжо Швецийысе Стокгольм олаште августышто, Вӱд арня жапыште, эртышаш.
Мо оҥайже, финалыш лекше чыла участник Россий Президентын грантшылан номинироватлатыт. А тидыже Российысе вузлаш тунемаш йӧным почеш. Сеҥыше-влакын лӱмыштым тыгак кӱкшӧ мастарлыкым ончыктышо икшыве-влак нерген кугыжаныш увер ресурсыш пуртат. Дарьян вуйлатышыже Политехнический лицей-интернатын биологий дене туныктышыжо Светлана Алябышева лийын.
С.НОСОВА
