Туризм

Самара, Тольятти – вучат

«Юл кундемыште чевер каныш кече-влак» программым илышыш шыҥдарыме амаллан кӧра ынде Марий Элыште илыше-шамычат «Самара- Тольятти» маршрутыш ушнен кертыт.

 Поезд Самарыш 30 июльышто кастене тарвана. Вес кечын тудо тушто лиеш. Мо тушто мемнан турист-влакым вуча? Эсогыл Европыштат  эн кужун шуйналтше сылнештарен шындыме эҥер сер. Тушто эр кочкышым ыштат, ола мучко экскурсий дене коштыктат. Жигулевысо сырам шолтымо заводыштат лияш да производствым ужаш, продукцийыштым тамлаш йӧн лиеш.

Олан ойыртемалтше архитектурыжо дене палдарат. Тудо кечынак кечывал кочкыш деч вара турист-шамычлан Тольяттим ончыктат. Гарибальдин замкышкыже экскурсий келшышаш. Готический стилян ты оралтыште модо показ, фотосессий-влакым эртатрат. Вертолет шичме площадкышкат намиен коштыктат. А кас кочкыш дене Юл кундемыште ик эн сылнылан шотлалтше верысе рестораныште сийлат. Тушеч Юл эҥер ден Жигулевский курык-влак койыт.

1 августышто поезд Зеленый Долыш толеш. Тушеч турист-влакым Йошкар-Олаш кондат. Тидын нерген Йошкар-Оласе турист-увер рӱдер увертара.

С.Носова

Опубликовать в Одноклассники

Добавить комментарий