УВЕР ЙОГЫН

«Российын историйыштыже — Кокла Юл кундем»

Йылмым, сылнымутым да историйым научно шымлыше В.М.Васильев лӱмеш марий иниститутышто ты темылан пӧлеклалтше регион-влак кокласе шанче-практик конференций эртен.

 Тачысе кечылан военный историй дене кылдалтше шымлымаш историй накуын ик эн сайын вияҥше направленийже, палемдат шанчызе-влак. Военно- исторический обществын ышталтмыжат тидлан полша. Конференций тудын регионысо пӧлкажын,  Марий Элын Тӱвыра, савыктыш да калык паша шотышто министерствыжын, Марий кугыжаныш университетын, Российысе историк-архивист-влакын обществыштын марий пӧлкажын полшымышт денак эртен. Тушко шанчызе, тоштер, образовательный учреждений пашаеҥ, краевед, журналист, студент-влак погыненыт. Марий Эл Кугыжаныш архивын пашаеҥже-влак исторический документ ончерым ямдыленыт. Погынышо-влакым Марий Эл Правительстве председательын икымше алмаштышыже Михаил Васютин, Тӱҥ федеральный инспектор Петр Журавлев да молат саламленыт.

Пленарный заседанийыште черемис калыкын пӱрымашыштыже сар могай рольым модмыж нерген Марий кугыжаныш университетын профессоржо, историй науко доктор Александр Бахтин ойлен. Татарстанысе науко  академий гыч историй науко кандидат Наталья Кореева 1812 ийысе Отечественный сар годым Казанский губернийын купечествыж нерген каласкален.  Историй науко доктор Сергей Стариков  1919-1920 ийласе граждан сарыште Марий кундемын шочшыжо-влакын участвоватлымышт дене кылдалтшле темым почын пуэн. Самарысе кугыжаныш социально-педагогике университет гыч толшо историй науко кандидат Елена Храмкова Кокла Юл кундемысе шанчыеҥ-влакын Кугу Отечественный сар дене кылдалтше шмлымашыштым иктешлен лектын.

     Варажым А.Бахтинын «Начало царства Казанского…» («Образование Казанского и Касимовского ханств»)  книгажын презентацийже эртен. Шукерте огыл тудын дене Озаҥысе Ш.Марджани лӱмеш историй иниститутыштат палдареныт. Амал деч посна огыл, вет книга Татарстан дене кылдалтын. Тусо презентаций годым шанчыеҥын луктын каласыме икмыняр ойжо Озаҥысе коллегыже-влак коклаште ӱчашымашым тарватен, возеныт татар изданий-влак. Книгаштыже Шӧртньӧ Ордан шаланымыж дене кылдалтше амал-влак шымлалтыныт. Кузе Казанский ден Касимвоский ханстве-влак ышталтыныт? XIII-XV курымлаште руш княжестве кузе илен? Автор чыла тидым иктешлен, у семын аклен.

Кечывал деч вара конференций секцийлашке куснен. Каласен кодыман, конференцийыш эсогыл Российысе науко академий, Иркутск, Ульяновск, Саратов, Саранск, Чебоксар, Ижевск, Пенза, Екатеринбург, Краснодар, Воронеж гыч шанчыеҥ-влак ушненыт.  

С.НОСОВА

Опубликовать в Одноклассники

Добавить комментарий