Кодшо арняште республикыштына «Профессий дене эн сай» конкурсын регионысо этапше «Ветеринар фельдшер» номинаций дене эртен.
Мероприятийлан Марий Элын Ветеринарий комитетше ден Вольык чер ваштареш кучедалше Марий станций вуйын шогеныт. Тудо Агробизнес пашаеҥ-влакым уэш ямдылыме институтышто эртен.
Конкурсыш чылаже 12 йодмаш пурен.
Кок кече жапыште эн сай ветеринар радамыш логалаш манын, участник-влак эн ончычак тестированийыште специальность ден шинчымашыштым тергеныт да комиссий ончылно вашмутыштым умылтарен пеҥгыдемденыт. А практике ужашыште вольыкым чын эмлаш кӱлмым ончыктеныт, шылын мо шот дене черан улмыжым тергеныт.
Сеҥышыш теве кӧмыт лектыныт:
I вер – Лидия Никифорова (Волжский миниципал округ);
II вер – Сергей Крылов (Килемар муниципал округ);
III вер – Татьяна Токтарова (Шернур муниципал округ).
Ончыл верыш лекше-влакым Нижегородский областьын, Мордовийын да Марий Элын Россельхознадзор управленийже-влакын, тыгак республикын Ялозанлык да кочкыш сату министерствыжын представительышт саламленыт.
Республикын паша да социальный аралтыш министрын алмаштышыже Александр Лазарев сеҥыше-влаклан 150, 100 да 50 тӱжем теҥгеаш сертификатым кучыктен.
Пайрем шӱлышым И.С.Палантай лӱмеш тӱвыра да сымыктыш колледжын тунемшыже-влак да марий эстрадын артистше-влак пуртеныт.
Палемдыман, Лидия Никифорова Марий Элын чапшым тыгаяк конкурсын федеральный этапыштыже нӧлташ тӱҥалеш. Тудыжо Саранскыште 21-22 июльышто лиеш. Тушто икымше верыш лекшылан ик миллион теҥгем кучыктат.
«Профессий дене эн сай» конкурс «Кадр» национальный проектын «Пашаче айдеме» федерал проектышкыже пура. Тудо пашаче профессийлан кумылаҥдымашке виктаралтын да эн сайыштым ойыраш полша.
Фотом Марий Элын ветеринарий комитетше гыч налме
