«Российын эн сай 100 сатужо»
Шкенан дене ыштен лукмо
Республикыште «Российын эн сай 100 сатужо – 2024» конкурсын регионал ден федерал йыжынлажым иктешлыме.
Конкурсыш 18 предприятий ушнен, нуно регионал йыжыҥыште 45 тӱрлӧ продукций ден услугым аклаш темленыт. Федерал кӱкшытыш 36 тӱрлӧ продукций ден 1 услуго лектыныт.
Сулен налме наградылам республикысе предприятий ден организаций-влакын вуйлатышыштлан регион вуйлатыше Юрий Зайцевын кӱштымыж почеш Марий Эл правительстве председательын икымше алмаштышыже Дмитрий Троицкий кучыктен.
«Российын эн сай 100 сатужо» конкурс – качестве шотышто ик эн тӱҥ конкурс. Тудо Россий экономикын моло дене таҥасен кертмыжым кугемдаш, вес элла гыч кондымо сатум алмаштен толаш да шкенан дене ыштен лукмо у, чапле, экологий могырым яндар сатум ситараш полша», – каласен Дмитрий Троицкий.
Тудо палемден: конкурсыш кугу веле огыл, тыгак изи да кокла кугытан бизнесын представительышт ушненыт, нуно тачысе кечын республикысе экономикын ӱшанле ужашыжлан шотлалтыт.
2024 ийыште конкурс «Кочкыш сату», «Калыклан промышленный сату», «Производственно-технический кӱлешлыкан продукций», «Калыклан услуго» номинацийла дене эртен.
Шуко предприятийже ты конкурсыш ик гана веле огыл ушнен да кажне гана эн сай лӱмым налаш праван улмыжым ончыктен. Ты радамыште –«Потенциал», «Полаир-Недвижимость», «Шернур сырзавод», «Звениговский», «Геникс», «Марий силикат кермыч завод», «Русь чай», «Марий картон мануфактур» да молат.
Сеҥыше радамыште конкурсыш шке услугышт да продукцийышт дене икымше гана ушнышо-влакат улыт. Тыгай коклаште Шернур районысо рӱдӧ больницым, «МЕТМА» АО-м, «Кристалл» ОКТБ-м, «Лина» ПК-м, ИП Ю.К.Антроповам ончыкташ лиеш.
Конкурсын федерал йыжыҥыштыже 12 тӱрлӧ продукций да 1 услуго «Лауреат» статусан дипломым да «Российын эн сай 100 сатужо» шӧртньӧ логотипым, а 24 тӱрлӧ продукций «Дипломант» статусан дипломым да «Российын эн сай 100 сатужо» ший логотипым кучылташ правам налыныт.
Сеҥыше-влак тыгай логотипым кок ий почела упаковкышкышт да сатулан документацийышкышт шынден кертыт.
Эрыкан эксперт ак почеш «Полаир-Недвижимость» АО-н кӱктымӧ деч ончыч руашым йӱкшыктарен ямдылыме камерже «Шӧртньӧ шӱдӧ продукций» («Золотая сотня») лӱм дене да Почётан диплом дене палемдалтын.
Тыгак республикысе кум предприятийын вуйлатышыже-влак «Качестве шотышто шумо сеҥымашлан» Почётан знакым налыныт.
Марий Эл Республик вуйлатышын пресс-службыжын уверже негызеш Юрий ИСАКОВ ямдылен
Снимкыште: «Шернур сырзавод» ЗАО-н качествым тергыме отделжым вуйлатышын алмаштышыже Татьяна Иванова ден Дмитрий Троицкий.
Д.Речкинын фотожо
