Марий Элыште социальный тӧнежлаште ыштыше пашаеҥ-влакын посна улмо «кумшо толкынышт» эрта.
Тудо 13 майыште тӱҥалын. Илалше ден инвалид-влакын Карлыган да «Сосновая роща» интернат-пӧртыштын, Красный Стекловар, Кожласола, Шоя-Кузнецово психоневрологический интернатлан, ийготыш шудымо-шамычлан палемдалтше «Журавушка» социально-реабилитационный рӱдерын, Савино йоча интернат-пӧртын пашаеҥышт «петырыме режим» манме у сменыште пашам уже ыштат. Тылеч посна Красногорский да Кундыштӱр психоневрологический интернат-влакын, «Таир» интернатын да ийготыш шудымо-влаклан палемдалтше Волжск оласе социально-реабилитационный рӱдерын пашаеҥышт тестированийын результатшым вучат. Нине еҥ-шамыч социальный тӧнежлаште илыше-влакын сай тазалыкышт верч шуко мом чыташ ямде улыт: физический ден эмоциональный нагрузкымат, лишыл еҥ-влак деч икмыняр жап посна илаш кӱлмымат… Социальный услугым налше граждан-влак дене пырля ты гана чылаже 207 пашаеҥ илаш тӱҥалеш.
Ушештарена, тений 15 апрельыште Марий Элысе 11 социальный тӧнежын пашаеҥже-влак ончымо еҥышт дене пырля посна улмо режимыш шке кумылын каеныт. Тылеч ончыч кажныже у коронавирус инфекций дене черланен кертмылан тестированийым эртен.
Коронавирусын пандемийже тӱҥалме жап гыч 15 май йотке Марий Элын Социальный вияҥмаш министерствыжын ведомствышкыжо пурышо 26 тӧнежыште дезинфекцийым ыштыме.
М.ИВАНОВА
