Марий Эл вуйлатыше Александр Евстифеев Россий ФНС-ын Марий Элысе управлений вуйлатышыже Лилия Гатина дене вашлийын. Тушто регионысо кучемын налог орган-влак дене вашкыл нерген мутланеныт.
Вашлиймаште ведомствын паша лектышыж дене палыме лийыныт, ончыкыжым вашкылым вияҥдышашлан мом ыштышашым палемденыт.
УФНС вуйлатышын палемдымыж почеш, 2018 ийыште республикын консолидированный бюджетышкыже, тыгак муниципал образований-влакын верысе бюджетлашкышт 16,5 млрд. теҥге налог доход лийын.
— Изи да кыдалаш предпринимательстве деч вич миллиард теҥге наре пурен. Тидыже ӱмашсе тыгаяк жап дене таҥастарымаште 600 миллион теҥгелан шукырак, — сай вашталтыш нерген палемден Лилия Гатина.
Налог ведомство вуйлатышын мутшо почеш, ӱмаште физический лица-влакын парышыштлан налогым пӧртылтымӧ кугытат ешаралтын. Тудо 2017 ийысе дене таҥастарымаште 20 процентлан кушкын да 1 млрд. 106 млн. теҥгешке шуын.
Тыгодым налогым, пеним, региональный да верысе налог шотышто налог санкций-влак дене кылдалтше парым 467 млн. теҥгем эртен. Туге гынат 2017 ий дене таҥастарымаште, тиде кугыт 72 млн. теҥгелан шагалемын.
— Идалык жапыште ме пашам суд пристав службо дене пырля ыштенна да тидак сай лектышыш шуаш полшен. Теният пеҥгыде кылым кученак тыршаш шонена, — каласен Лилия Гатина.
2018 ийыште управлений, верыш лектын, 67 налог тергымашым эртарен. Тидыже 420 млн. теҥгем ешараш полшен.
Управлений вуйлатыше Александр Евстифеевлан панкрутыш лекше-влак нергенат ойлен. 2019 ий 1 январьлан налмаште, ты шотышто ведомствышто 240 исполнительный производство уло, нунын кокла гыч 99 – организаций, 141 — физический лица дене кылдалтше, палдара Марий Эл Республик вуйлатышын организаций да аналитике виктемже.
Л.Камалетдинова.
