КУЧЕМ УВЕР

Эҥер корныш лектыда гын

Марий Элыште эҥер ден ийын, мотор вер-шӧрлам ончен коштмо пагыт тӱҥалын.
Пӱртӱс дене кылдалтше туризм еҥ-влаклан паша деч каналташ, чон ласкалыкым налаш полша. Но тыгай маршрутлаште туткарышкат логалаш лиеш. Сандене корныш тарваныме деч ончыч ойырен налме маршрутым республикысе кычалше-утарыше подразделенийлаште регистрироватлыман.
Граждан аралалтмаш комитетын специалистше-влакын умылтарымышт почеш, маршрутыш лекме нерген 10 паша кече деч ончыч увертарыман. Республик мучко корныш тарваныше турист тӱшка-влак Россий МЧС-н Марий Элысе Тӱҥ управленийштыже регистрацийым эртышаш улыт. Тидлан 69-02-74 номерыш йыҥгыртыман але Россий МЧС-н сайтше, тыгак Марий аварийно-утарыше службыш ( номерже 74-12-84) але сайтше гоч шижтараш лиеш.
Кеч-могай маршрутым туризмын активный видше-влак дене услугым пуышо юридический лица ден посна предприниматель, посна турист ден турист тӱшка-влакат регистрироватлышаш улыт. Тыгак шке гыч корныш тарваныше да пырля ийготыш шудымо икшывым налше-шамычат. Ойырен налме маршрутышто шуко курык, вӱд але миен шуаш шуко тӧрсырым эртыман, илышлан лӱдыкшӧ лийын кертеш гын, тидым поснак шотыш налман. Тиде бюрократ-влакын нимо уке гыч шонен лукмо темлымашышт огыл, корнышто тӱрлыжат лийын кертеш. А ЧП лиеш гын, утарыше службо-влак кушто улмыдам пален, вигак полышым колтат.
Каласен кодыман, тенийлан Маий Элын Молодежный политике, спорт да туризм министерствыжын ямдылыме турмаршрут да экскурсий программе реестрышкыже 287 направлений пурталтын.
                                                                                                                                     С.НОСОВА

Опубликовать в Одноклассники

Добавить комментарий