Марий Эл вуйлатыше Александр Евстифеев 4 июльышто селекторный совещанийыште лийын. Тушто дольщик-влакын праваштым аралыме шотышто мерым ыштыме нерген мутланеныт. Совещанийым Россий Федерацийын чоҥымо паша да илыме вер ден коммунал озанлык министр Владимир Якушев эртарен.
Илыме верым чоҥымо пашам финансироватлыме системым ыштыме нерген закон тений июль гыч илышыш пурен. Тудо дольщик-влакын праваштым утларак аралышаш.
Республикысе кучемын шонымыж почеш, у закон чоҥымо рынкыште тӱрлӧ семын ондалкалаш тыршыме мошеннический схеме-влак дене пайдаланаш эрыкым огеш пу. У законлан кӧра ондалалтше дольщик-влак тетла лийшаш огытыл. Молан манаш гын долевой чоҥымашке ушнышо еҥ-влакын оксаштым кучылтмо паша контрольышко налалтеш да вошткойшо лиеш.
29 июньлан ончымаште Марий Элыште кум «проблемный» манме объект уло. Тушко 116 дольщикын оксажым кучылтыныт, но тыгодым праваштым пудыртеныт. Александр Евстифеев нине объект-влак шотышто план-графикым пеҥгыдемден. Тудын дене келшышын, паша 2020 ий мучаш марте ышталт шукталтшаш.
Дольщик-влакын неле йодышыштым рашемдышашлан Марий Элыште посна законым приниматлыме да улшышкыжо вашталтышым пуртымо. Тыгак нине законым илышыш пурташ Марий Эл Республикын правительствыже кок пунчалым луктын, палдара Марий Эл Республик вуйлатышын организаций-аналитике виктемже.
Л.Камалетдинова.
