УВЕР ЙОГЫН

Марий Элыште ужармужо дене черланыше-влак шукемыныт

2018 ийыште тиде кече «Тӱнялан ужармужо деч эрыкан еҥ-влак кӱлыт. Шке надыретым историйыш пыште. Ужармужым чарен шогалте!» девиз дене эрта. 

Кодшо ийын Марий Элыште 100 тӱжем еҥлан шотлымаште 50,5 еҥ ужармужо дене черланен, тиде – 300 утла гражданин. Тиде показатель 2016 ий деч 4,2 процентлан кугу, а Россий Федерацийын показательже деч – 11 процентлан.

2017 ийыште регионыштына 13 подростко ден 14 ияш марте йочан чолга форман ужармужо дене черланымыжым рашемдыме. Ик подросткым бациллярный форман ужармужо дене диспансерын учётышкыжо шогалтыме да эмлымверыш пыштыме.

Оласе дене таҥастарымаште ялысе-влак ужармужо дене чӱчкыдынрак черланат, тӱҥ шотышто – пашам ыштен кертше, но пашадыме-шамыч. Пенсионер-влакынат черланыме чотышт кугу. Ужармужо дене черланыме чот У Торъял, Кужэҥер да Килемар районлаште палынак кугу.

Черым тӱҥалтыш йыжыҥыште рашемдаш манын, кодшо ийын рентгенофлюорографий йӧн дене регионысо чумыр калык гыч 69,2 процентшым шымлыме.

2007 ий гыч Роспотребнадзорын Марий Элысе виктемже йот элласе граждан-влакын тазалыкыштым эскерыме мониторингым организоватлен. Кодшо ийын 990 еҥым тергыме, нунын коклаште ужармужо дене черланышым рашемдыме огыл.

М.ИВАНОВА.

Опубликовать в Одноклассники

Добавить комментарий