17 июль. Инвалид-влакын III всероссийский кеҥеж спартакиадышт умбакыже шуйна. Мемнан республикын сборный командыже шкенжым кузерак ончыкта? Тидын шотышто Марий Элын командыжым вуйлатыше Кирилл Печенин дене мутланышна.
— Кирилл Игорьевич, тачысе кечылан ме могай верыште улына?
— Тачысе кечылан команде-влак кокла гыч эн шуко очком Моско ола поген. Нунын деч изишлан гына Башкортостан Республик ден Свердловск областьын командыже вараш кодыт. А ме, Марий Элын командыже, 15-ше строкаште улына. Спартакиадыште Хакасий Республикын командыже ик очкомат поген огыл.
— Мемнан командын мыняр да могай медальже-влак улыт?
— Вич – шӧртньӧ, кок – ший да куд — бронзо. Тиддеч посна эше таче Михаил Чижиков иймаш дене сокыр-влак коклаште эн тале лийын, шӧртньӧ медальым налын. Тыгак 200 да 100 метрым куржмаште ошкылмо-тарванылме шотышто йӧсланыше-влак (ПОДА) коклаште Светлана Назарова шӧртньӧ медальын озаже лийын.
Спортсмен-влак кокла гыч кӧмыт ойыртемалтыт?
— Шӧртньӧ медальым тыгак уш-акыл шотышто экшыкан-влак (ЛИН) коклаште Клим Румянцев иймаш, сокыр-влак коклаште Юлия Ожиганова дзюдо дене налыныт. Ший медаль дене Наталья Семенова (ЛИН, иймаш), Клим Румянцев (ЛИН, икмаш), Полина Желонкина (соҥгыра, иймаш) палемдалтыныт. А бронзым уэш нунак: Желонкина, Чижиков да Семенова — налыныт. А такшым командыштына чыланат чолга, нелылыкым сеҥаш тунемше, кӧргӧ вий-куатан ӱдыр-рвезе-влак улыт.
— Мемнан команде гыч спортсмен-влак могай дисциплиныште вийыштым тергат?
— Спартакиадын финал таҥасымашыштыже сокыр, соҥгыра, уш-акыл шотышто экшыкан, церебральный паралич черан да ошкылмо-тарванылме шотышто йӧсланыше-влак бочче, куштылго атлетике, ӱстембал теннис, иймаш, голбол, дзюдо, футбол дисциплинылаште чолгалыкым ончыктат. А мемнан команде боччаш да голболыш ушнен огыл. Такшым мыняр шуко дисциплиныште вий-куатым тергет, очко тунар шукырак лиеш. Садлан вес гана меат чылашкыжат ушнаш манын, чот ямдылалташ тӱҥалына.
А.Байкова
