30 ноябрьыште Москосо Станиславский да Немирович-Данченко лӱмеш музыкальный театрыште Россий балет наградым кучыктеныт, увертара республикын Тӱвыра, савыктыш да калык паша шотышто министерствын пресс-службыжо.
Тений 16 призшымат элыштына театр ден ансамбль-влакын вуйлатышыштлан пуэныт.
«Куштымашын рыцарьже» номинацийыште Йошкар-Оласе Бауман лицейын директоржо Григорий Пейсахович палемдалтын, а Э.Сапаев лӱмеш опер да балет театрын солистше Артем Веденкин «Нӧлталтше шӱдыр» номинацийыште ойыртемалтын.
Пайрем касын концерт программыштыже Моско театрын артистше-влак дене пырля опер да балет театрнан прима-балериныже Екатерина Байбаева ден премьер Артем Веденкин мастарлыкым ончыктеныт.
Палемдыман, «Куштымашын чонжо» наградым 1994 ий годсек куштышо мастер, педагог, композитор, дирижер, сӱретче да куштымаш искусствышто сеҥымашке шумо нерген возышо журналист-влаклан кучыктат.
А.БАЙКОВА
Фотом театрын архивше гыч налме
