Шочмо элым аралыше-влакын кечышт вашеш М.Шкетан лӱмеш Марий национальный драме театр поро кумылым ончыктымо акцийыш ушнен.
21 февральыште артист-влак «Чоҥешта турня кашта», а 22 февральыште «Кавасе алаша» спектакльлам модын ончыктеныт. Кок постановкыжат Кугу Отечественный сар нерген.
– Элыштына ынде нылымше ий спецопераций кая. Тушто марий салтак-влакат шке порысыштым шуктат. Кок спектакльланат билетым ужалыме окса дене гуманитар полышым налына, – палемден спектакль тӱҥалме деч ончыч театрын тӱҥ режиссёржо Роман Алексеев.
Марий Элысе Калык фронтын еҥже Рудольф Росляковым зал тич погынышо калык шокшын вашлийын.
– Калык фронтын регионысо пӧлкаже СВО-што улшо да салтак-влакын ешыштлан икмыняр направлений дене полша. «Чылажат сеҥымаш верч!» фонд тушман ваштареш кредалше да тылыште улшо-влак дене кылым ышташ полша.
«Пырляште – вий» манме ой таче кечылан моткочак келшен толеш. Вет республикыштына кажне еҥ кертмыж семын боецна-влаклан полшаш тырша. Тиде радамыш Шкетан лӱмеш Марий драмтеатрымат пуртыман. Гуманитар конвойым колтымо годым артист-влак ятыр гана полшаш миеныт, – таум каласен СВО кундемыш ятыр гана миен коштшо Рудольф Геннадьевич.
Марий Элыште Калык фронтын исполкомжым вуйлатыше Валентин Севастьяновын кӱштымыж почеш театр коллективлан, тӱҥ режиссёр Роман Алексеевлан, театрын сем ужашыжым вуйлатыше, мурызо Светлана Яндуковалан да комендант Алиса Росляковалан наградым кучыктен.
Палемдыман, наградым налше-влак чыланат СВО кундемыш миен коштыныт.
Чынжымак, тиде кок кечын театрыш мийыше-влак спецопераций нерген кумданрак пален налын кертыныт. Выставкыште СВО каен шогымо кумдык гыч кондымо салтак-влакын вургемышт, тушман ваштареш кредалме арверышт ик жаплан сӧй пасуш «пӧртылтеныт».
Сеҥымашым лишемдаш полшаш шонышо-влак маскироватлалтме сеткым пидмашке кумылын ушненыт. Кок кечыште театрын пашаеҥже, артист-влак да спектакльым ончаш толшо-шамыч кок сеткым пидыныт.
– Тендан полышда сеҥымашым лишемдаш полша! Тау тыланда, таза лийза», – манын каласен кокымшо кечын спектакльым ончаш мийыше СВО-н салтакше.
Алевтина БАЙКОВА
Фотом театрын альбомжо гыч налме
