Тазалык шотышто нелылыкым шижше шуко еҥ мӧҥгыштӧ ынеж шинче, иктаж пашам ыштынеже, пайдале лийнеже. 2017 ий 1 октябрьлан Марий Эл Республикын калыклан паша верым ситарыме рӱдерлашкыже 720 инвалид келшыше пашам кычалын толын. Специалист-влак 218 еҥлан паша верым муаш полшеныт.
Россий Пенсий фондын Марий Элысе пӧлкажын палемдымыж почеш, республикыштына пашам ыштен кертше ийготан 18760 инвалид ила, нунын кокла гыч 3937 еҥже (20 процент деч изиш шукырак) пашам ышта.
Чыла тидым шотыш налын, калыклан паша верым ситарыме рӱдер-влак инвалид-шамычлан специализироватлыме вакансий ярмиҥгам эртарат. Тений индеш тылзе жапыште республикыштына тыгай сынан 14 ярмиҥга эртен, 39 предприятий ден организацийын темлыме вакансийышт дене 14 инвалид пайдаланен.
Тылеч посна пашадыме 243 инвалид социальный адаптаций дене занятий-влакым эртен, 338 еҥ психологий полышым налын, профориентаций услуго дене 738 еҥ пайдаланен. Ик инвалид тунемаш пурен.
М.ИВАНОВА.
