СОЦИАЛ ИЛЫШ

Каласе, «Марий Эл»: Отпуск чаракым ок ыште

Марий кугыжаныш университетын нылымше курсыштыжо тунемам. Стипендий деч посна эше пукшышым йомдарыме шотышто пенсийым налам. Мӱшкыран улам, сандене у ий гыч академический отпускыш каяш шонем. Каласыза, пожалуйста, тудым пуат гын, пукшышым йомдарыме шотышто пенсийым тӱлымым чарнат мо?

 И.Андреева.
Морко район.

 

Йодышлан Россий Пенсий фондын Марий Элысе пӧлкажын пресс-службыжым вуйлатыше Наталья Мирошина вашешта:

– Пукшышым йомдарыме шотышто пенсийым илыш гыч кайыше еҥын ешыштыже кодшо пашам ыштен кертдыме членже-влаклан пуат. Нунын коклашке очный формо дене тунемше 18 ияш марте, но 23 деч кугу огыл ийготан йочаже-влакат пурат. Очный формо дене тунемше студентлан южо случайыште академический отпускым пуат. Тудым медицине темлымаш, еш але вес обстоятельстве амал дене оформитлат. Академический отпускышто улшо студентым тунемме тӧнеж гыч луктын колтен огыт керт. Военный службыш кайыше деч моло студент академический отпускыштат тунемшылан шотлалтыт. Тыгеракын, академический отпускышто улшо тунемшылан але студентлан пукшышым йомдарыме шотышто пенсий ончычсо семынак тӱлалтеш.

М.ИВАНОВА.

Опубликовать в Одноклассники

Добавить комментарий