Тений кеҥежым Марий Элыште 40 вере официальный пляж пашам ышташ тӱҥалеш.
Тышеч 15 — муниципальный, а молышт йоча тазалыкым пеҥгыдемдыме да каныме базыла пелен лийыт. Йошкар-Олаште вӱдыш йӱштылаш пурымо сезоным 3 июньышто почаш палемдыме, Козьмодемьянскыште — 8 июньышто, Волжскышто — 9 июньышто. Палемдыме кечылан чыла пляжым ГИМС-ын инспекторжо-влак терген лекшаш улыт. Кажныштыже утарыше пост лийшаш. Тудым ийын коштмо средстве, кӱлеш оборудований да снаряжений дене пойдарат. Тушто утарыше-влак дежуритлаш тӱҥалыт. Йӱштылаш пурымо кумдыкымат ончылгоч палемдат да авырен налыт.
Пляжыште тыгак кок тӱсан флагым нӧлталаш йонештарыме мачтым вераҥдат: нарынче тӱсан флаг йӱштылаш лийме нерген шижтара гын, шем флаг тидым ышташ чарымым ончыкта. Тыгак пляж кумдыкышто кече деч шылаш, вургемым вашталтен чияш келыштарыме вер, олымбал-влак, туалет лийшаш улыт.
С.НОСОВА