Марий Эл вуйлатыше Александр Евстифеев республикын Кугыжаныш Погынжын комитет председательже-влак дене законотворчестве шотышто ончыкылыклан паша план да регионлан кӱлешан йодыш-влак шотышто исполнительный ден законодательный кучемын вашкылым ыштен тыршышашышт нерген мутланен.
Социальный вияҥмаш шотышто комитет председатель Александр Карташов паша палыме манын да могай задачым шукташ кӱлмым тӱрыс умылымыж нерген каласен.
— Мыланна пырля пашам ышташ оҥай лиеш, шонем. Умылем, южо йодыш шотышто шонымашна ойыртемалт кертеш, но тӱҥжӧ – каҥашымаш пайдале лийже, — каласен Александр Карташов.
Ойлымыж почеш, шке шонымашым ӱшандарышын пеҥгыдемден моштыман да законопроект-влакым каҥашыме годым йӱклымӧ жапыште сайын шонен ямдылыме темлымашым ыштыман.
Здравоохранений, тӱвыра да спорт комитет председатель Евгений Кузьмин дене мутланымыж годым Александр Евстифеев ушештарен: республикын бюджетшын 60 утла процентше социальный йодыш-влакым рашемдаш кучылталтеш. Тыгак здравоохранений да демографий шотышто национальный проект-влак улмым, республикын правительствыжын тазалыкым аралыме йодыш дене эреак пашам ыштымыжым, кушто могай медучрежденийым чоҥымым, молым палемден коден.
Евгений Кузьминын ойлымыж почеш, комитет тӱрлӧ сынан пашам шуктышаш.
— Тӱвырашке искусство веле огыл, тыгак национальный политикат пура. Тидыже моткочак кӱлешан, молан манаш гын ме национальный регионышто илена. Тыгак тиде – республикын шӱдӧ ийжым палемдымаш. Республикыште илыше, регионысо правительстве могай задачым шында, ме каҥашаш, сайын вискалыме, келшен толшо решенийым приниматлаш тӱҥалына. Пашана тӱвыргӧ лектышан лийшаш, — ӱшандарен каласен комитет председатель.
Марий Эл вуйлатыше палемден: исполнительный да законодательный кучем ончылно икгай цель палемдалтын – республикысе калыкын илышыжым саемдаш. Тидланак национальный проект-влакат виктаралтыныт. Республик вуйлатыше комитет председатель-влакым нуным илышыш пуртымо годым келшен да кугу лектыш дене пашам ышташ ӱжын.
Марий Эл Республикым вуйлатышын организаций да аналитике виктемжын уверже нергызеш Л.КАМАЛЕТДИНОВА ямдылен
