25 мартыште культур пашаеҥ-влак профессионально пайремыштым палемдышт. Тиде кечынак Тӱвыра, савыктыш да калык паша шотышто министерствын коллегийжын кумдаҥдыме заседанийже эртыш.
Э.Сапаев лӱмеш опер да балет академический театрыш республикнан рӱдолаж ден районлаж гыч тӱвыра учрежденийлаште пашам ыштыше, усталык коллектив-влакым вуйлатыше, калыкнан тӱвыражым аралымашке да вияҥдымашке кугу надырым пыштыше-влак чумыргеныт.
Культур пашаеҥ-влаклан пайрем шӱлышан видеосаламлымашым Марий Эл вуйлатыше Александр Евстифеев колтен. Варажым Марий Эл Правительстве председательын икымше алмаштышыже Михаил Васютинат залыш погынышо-влакым саламлыш да тӱвыра аланыште ятыр ий пашам ыштыше, калыкнан акрет годсо поянлыкшым аралымашке надырым пыштыше-влаклан правительстве наградым кучыктыш.
«Волжская правда» газетын тӱҥ редакторжо Александр Лукаев «Российын сулло журналистше» лӱм дене палемдалте. МарНИИЯЛИ-н тӱҥ шанче пашаеҥже, историй науко доктор, учёный-археолог Татьяна Никитина «За заслуги перед Марий Эл» II-шо степенян орден, «Марий книга издательство» савыктыш пӧртын книга савыктыш пӧлкажын тӱҥ редакторжо Надежда Лихачёва ден «Ямде лий» газетын тӱҥ редакторжо Лидия Семёнова (кызыт «Марий Эл» газетыште сылнымут редактор — авт.) «За заслуги перед Марий Эл» орденын медальжым нальыч, аИ.С.Палантай лӱмеш тӱвыра да сымыктыш колледж вуйлатышын алмаштышыже, преподаватель Ольга Данилова «Марий Эл культурын сулло пашаеҥже» лӱм дене палемдалте. Тиддеч вара Михаил Зиновьевич икмыняр еҥлан Марий Эл правительствын Чап грамотшо ден Таумутшым кучыктыш.
Пайрем кечын тӱвыра пашаеҥ ден ты аланын ветеранже-влакат Марий Элын Кугыжаныш Погын председатель Анатолий Смирнов деч саламлымашым нальыч.
2020 ийыште республикысе культур аланыште шуко паша ышталтын, ятыр фестиваль ден конкурс-влак эртаралтыныт, «Тӱвыра» национальный проект полшымо денат сай вашталтыш-влак лийыныт. Тидын нерген пайрем лӱмеш ямдылыме фильм гоч пален налын кертна.
Тӱвыра, савыктыш да калык паша шотышто министр К.Иванов министерствын да ведомство учреждений-влакын эртыше ийыште ыштыме пашашт нерген каласкалыш да 2021 ийыште ыштышаш сомыл нерген палдарыш.
– Тений «Тӱвыра алан» нацпроект полшымо дене Советский районысо Вечын тӱвыра пӧртын леведышыжым вашталтышаш, Сотнур селасе тӱвыра пӧртым капитально олмыктышаш улына. – рашемдыш Константин Анатольевич. – Кужэҥер, Морко, Советский, Юрино районласе йоча сымыктыш школ-влакат у тӱсым налшаш улыт. Тиддеч посна лу муниципальный районышто лишыл жапыште у автоклуб дене пайдаланаш тӱҥалыт.
Тиддеч вара К.Иванов Россий культур, Цифровой вияҥмаш, связь да массовый коммуникаций да Марий Эл культур министерстве-влакын Таумутыштым, тыгак республикысе культур аланыште окса премий дене палемдалтше-влаклан диплом ден пеледыш аршашым кучыктыш.
А.БАЙКОВА
Е.Никифоровын фотожо
