УВЕР ЙОГЫН

Илыш корнышто – 102 ий

 8 январьыште, Йошкар-Олаште илыше Татьяна Александровна Румянцева 102 ийым темен! Лӱмгече озам йочаж ден уныкаже-влак, уныкаже-шамычын шочшышт, лишыл еҥже-влак ден уло родо-тукымжо саламлаш погыненыт.
Пайремыш Йошкар-Оласе Калыкым социально обслуживатлыме комплексный рӱдерын пашаеҥже-шамычат миеныт да Татьяна Александровналан Марий Элым вуйлатышын лӱмжӧ дене саламлымашым, шарнымашан пӧлекым да пеледыш аршашым кучыктеныт.
Т.Румянцева 1919 ийыште Киров область Санчурск район Александровский почиҥгаште кресаньык ешыште шочын. Ныл классым тунем пытарымекыже, «Йошкар шӱдыр» колхозышто пашам ышташ тӱҥалын, вара «Санчурский» совхозышто тыршен – тушечынак сулен налме канышыш лектын.
1940 ий 15 февральыште шкеж деч вич ийлан кугурак Александр Михайлович Румянцевлан марлан лектын. Но пиалышт кужун шуйнен огыл: ешвуй фронтыш каен да… сарыште пленыш логалын. Татьянан кидыштыже изи ӱдырышт лийын, сандене марийже илыше кодшо, мӧҥгӧ таза пӧртылжӧ манын, Юмым йӱдшӧ-кечыже манме гай сӧрвален. Да арам огыл!
1946 ийыште Татьяна Александровна ден Александр Михайлович Тула областьыш кусненыт. Суртоза шахтыште пашам ыштен, а озавате ныл ӱдырышт ден ик эргыштым воспитатлен. Нуныжо ушан-шотан айдеме лийыныт.
Илыш корныштыжо шуко неле-йӧсым ужын да чытен гынат, Татьяна Александровна тугаяк поро чонан кодын. Илалше ӱдырамаш кажне дене чоным почын, куанен мутлана.
Пашан ветеранже, тылын труженикше Татьяна Александровна Румянцевалан меат пеҥгыде тазалыкым, пиалым, тыныс илышым тыланена.

М.ИВАНОВА
Фотом Марий Элын Социальный вияҥмаш

министерствыжын сайтше гыч налме

Опубликовать в Одноклассники

Добавить комментарий