КУЧЕМЫШТЕ

Жапым йомдарыде…

 

20 сентябрьыште Йошкар-Олаште Калыклан социальный полышын мерыже-влакым пуымо рӱдерым почмо. Но тылеч ончыч тушко Марий Элым вуйлатыше Александр Евстифеев миен коштын.

Помещенийым тӱрыснек олмыктымо, шуктымо паша ден налме оборудованийлан 7,3 млн. теҥгем кучылтмо. Регионым вуйлатыше «электрон черетын» пашаж ден уэмдыме рӱдерым ончен, персонал дене мутланен.

Калык илышым вияҥдыме шотышто министр Марина Островскаян мутшо почеш, рӱдерыште планировкым вашталтыме, документым налме «ик окнам» ыштыме, калыкын личный делажым аралаш кӱртньӧ шкафлам налме, кондиционирований системым, пушкыдо мебельым шындыме, йоча лукым келыштарыме.

«Ик номеран телефоным ыштенна. Йыҥгыр 35 оператор деке кая. Нуно огыт вашеште гын, йыҥгыр Калык илышым вияҥдыме шотышто министерствыш кусаралтеш. Кыл министерстве денат огеш лий гын, йыҥгыр министр деке толеш», – увертарен М.Островская.

Рӱдер кызытеш 8.30 гыч 17 шагат марте ышта, но ончыкыжым, калыклан толын каяш йӧнан лийже манын, паша радамжым вашталтенат кертыт.

Министр «Тазалык» аппаратно-программный комплексым ончыктен. Тудо айдемым врач деч посна шке семынже шымла да могай продуктым кочкаш кӱлмӧ шотышто темлымашан диагностический кагазым пуа. Тыште черетым вучышо чыла еҥ капкыл температуржым, вӱргорно давленийжым, вӱрын кислород дене мынярак шыҥдаралтмыжым, кӱкшытшым, нелытшым висен кертеш. Диагностике деч вара чыла показатель ден темлымашым ончыктыман распечатке пуалтеш, тудым электрон почто гочат налаш лиеш. Шымлымашым чыла еҥ яра эртен кертеш.

«Республик бюджетын 60 процент ужашыже социальный цель-влаклан ойыралтеш, рӱдерын пашажат нине задачым шуктымашке виктаралтын. Тыште чыла сай, чыла йӧнан: айдеме шке пашажым жапым йомдарыде шуктен кертеш. Мыйын шонымаште, паша радамым тӧрлаш кӱлеш», палемден А.Евстифеев.

Рӱдерыште 30 сентябрь марте пашаеҥ-влакын кабинетлаштым олмыктен пытарышаш улыт.

Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен

Опубликовать в Одноклассники

Добавить комментарий