Федеральный экологический операторын полшымыж дене «Утилизируй Правильно и Модно» сотемдарыме акций стартым налеш.
7-20 декабрьыште «Экологий» национальный проект ден «Экозабота» всероссийский проектым илышыш пуртымо кышкарыште «Likee» социальный кылын платформыштыжо «Утилизируй Правильно и Модно» сотемдарыме акций эрта. Тудо кӱлдымыш савырныше батарейке-влакым чын переработатлымылан да ик гана пайдаланыме батарейке олмеш аккумуляторым налаш ӱжмылан пӧлеклалтын.
Акций кышкарыште социальный йодыш ден экологийлан тӱткышым ойырышо, 20000000 утла возалтше еҥан 12 топ-блогер батарейкым чын утилизироватлыме радамым ончыктышо, батарейке олмеш аккумуляторым налаш кумылаҥдыше да пайдаланыше-шамычым проектыш ушнаш ӱжшӧ видеоролик-влакым интернет кумдыкыш колта.
Акцийлан проектын тӱҥ татше да ужашыже-влак дене палдарыше, батарейкым кузе пытараш кӱлмӧ нерген каласкалыше «Утилизируй Правильно и Модно» музык композицийым возымо. Тудын демо-версийжым (https://yadi.sk/d/m7XAFSInq5Np7w) Likee платформышто вераҥдыме.
Акцийыш ушнашлан икмыняр условийым шукташ кӱлеш:
• музык композиций йоҥгымо йӱкеш батарейкым чын переработатлыме ужашан 15 секундаш видеом войзыман;
• акций жапыште Likee сетьыш #экозабота хештег дене «батарейкым чын утилизироватлыза да аккумулятор дене пайдаланаш тӱҥалза» ӱжмашан постым вераҥдыман.
Акцийым иктешлыме годым блогер-влак эн сай видеом ойырен налыт да 23 декабрьыште шке аккаунтыштышт сеҥыше-влакым увертарат. Сеҥыше-шамыч дизайнер логотипан сувенир дене палемдалтыт. Тыгак акций жапыште эн шуко йӱкым погышо участник-влак Федеральный экологический оператор деч тематический электрон наклейкым (стикер-паки) налыт.
Акцийын тӱҥ задачыже – школышто тунемше-шамычын тӱткышыштым батарейкым чын утилизироватлымылан да аккумулятор дене пайдаланаш кумылаҥдымылан ойыраш.
«Кӱлдымыш савырныше батарейкым пытарыме йодыш элыштына моткоч пӱсын шога. Чаманен палемдыман, тиде арверым пеш шагал еҥ чын утилизироватла. «Экологий» нацпроектын тӱҥ задачыже – йырым-йырысе средам аралаш. «Утилизируй Правильно и Модно» челленджна полшымо дене ме кучылтмо батарейкым чын пытараш кӱлмӧ, тудын йырым-йырысе среда ден айдемын тазалыкыштлан кугу зияным ыштымыж нерген шинчымашнам кажне еҥ деке намиен шукташ тыршена. Вет шӱкым оптымо ведрашке кудалтыме улыжат ик батарейке 20 квадрат метр кумдык мланде ден 400 литр вӱдым амырта! Батарейкым чын утилизироватлыме койышна дене элланат, экологийланат кугу пайдам конда», — палемда «Национальные приоритеты» АНО-н генеральный директоржо София Малявина.
«Экозабота» школ проект 2020 ий июньышто стартым налын. Тиде жапыште Российысе 30 олан 3000 утла школыштыжо шинчымашым погышо ӱдыр-рвезе-влак 7 тонн утла батарейкым погеныт.
Тиде программе калыкын экологий шинчымашыжым нӧлтымашке да йочам йырым-йырысе средам аралаш туныктымашке виктаралтын. www.batteryshare.ru сайтыште илышыш пурталтше акцийыш пилотный регионласе школ-влакат ушнен кертыт. 2021 ий майыште экологий шотышто иктешлыше видеоконференций эртаралтеш. Тушто акцийым иктешлат, чапланыше спикер-влак сеҥыше ден экологий теме дене видеолекций-влакым палемдат.
Проект Ангарскыште, Белебейыште, Владивостокышто, Златоустышто, Ижевскыште, Иркутскышто, Камбаркыште, Кировышто, Краснодарыште, Курганыште, Магнитогорскышто, Миассыште, Мирныйыште, Михайловскийыште, Москваште да Москва областьыште, Нижний Новгородышто, Новочебоксарскыште, Октябрьскийыште, Пермьыште, Санкт-Петербургышто, Саратовышто, Сочиште, Ставропольышто, Троицкыште, Усолье-Сибирскоеште, Уфаште, Хабаровскышто, Чебоксарыште, Челябинскыште, Щучьеште илышыш пурталтеш.
М.ИВАНОВА
