Шочмо кундемын каласен мошташ лийдыме моткочак кугу вийже уло: тудо кеч-кӧмат шкеж деке чытыдымын шупшеш. Мланде шарын кеч-могай лукыштыжо иле – шочмо ялыш, шочмо вер-шӧрыш кеч ик жаплан миен, ужын толде, чон огешак чыте.
Венгрийыште шочын-кушшо да ӱмыржӧ мучко тушто илыше Жолт Бендо шкеже марий кундем гыч огыл гынат, вожшо – тышеч. Ачаже, Константин Спиридонович Сапожников У Торъял районысо Тошто Торъял села гыч лийын. Тидын нерген ме кум ий ончыч радамлын возенна ыле. Тунам 26 сентябрьыште венгр пӧръеҥ илышыштыже икымше гана Марий Элыш толын.
Теният Жолт тиде жапыштыракак, 16 сентябрьыште, кодшо рушарнян, ачажын шочмо кундемышкыже толын кайыш. Кодшо гана кок кече шоген гын, ты гана икмыняр шагатлан веле толаш йӧнжӧ лийын гынат, тӱҥжӧ – уэш пӧртылын. Кум ий ончыч чеверласымыж годым тудо уэш толаш сӧрен каен ыле да сӧрымыжым шуктен.
Кумданрак — «Марий Эл» газетын
2018 ий 21 сентябрьыште лекше номерыштыже лудын кертыда.
Любовь Камалетдинова.
