У Торъял район Тошто Торъял школышто ятыр ий ӱдыр-рвезе-влакым И.Хлыбов физкультур ден спортлан кумылаҥда. Тӱҥ пашаже – ече дене тренер-преподаватель. Тыгодым тудо чыла вид денат, манаш лиеш, таҥасымашлашке лекташ ямдыла, физкультур урокым туныктышылан полша.
Теҥгече У Торъял районышто изирак ийготан рвезе-влак коклаште «Шӱштӧ мече» турнир эртаралте. Тушто тудын воспитанникше-влак сай результатым ончыктеныт. Нунын коклаште поснак Кирилл Ключевым, Никита Ивановым, Кирилл Смирновым мокталтыман. Рвезе-влак тыгак спортын моло видыштыжат вийыштым тергат, район кӱкшытыштӧ призёр радамыш логалыт.
Кодшо арнян тиде школышко мийымына годым рвезе-влак лач стадионышто тренировкым эртат ыле. Чапле формым чиеныт. Тудыжым лӱмынак школ ойырен. Ик капка деч весыш куржталмеке, ятыр пӱжвӱдым йоктарышт. Рвезе-влак пеш писын куржталаш тыршат, футбол мечымат туран чумат, пасымат жапыштыжак кӱлеш семын пуат. «Мастарлык ден опыт мыланна эше огыт сите. Такшым тунемына, чылажат эше ончылно, шонена. Но таҥасымашлаште сеҥыме, ончыко лекме шуэш», – шыргыжалын маньыч рвезе-влак.
Е.Эшкинина.
М.Скобелевын фотожо.
