Марий Эл гыч колызо колым кучымо дене чапланыше таҥасымаште сеҥышыш лектын
Мемнан республик гыч Игнат Прохоров ден Татарстан гыч Евгений Карчинскийын экипажышт «GRUNDENS PAL OPEN» всероссийский таҥасымашын квалифицированный турнирыштыже кумшо верым сеҥен налын. Пӧлек шотеш нунылан 300 тӱжем теҥге призым кучыктеныт.
Ынде нуно лигын тӱҥ таҥасымаштыже элын эн сай колызыжо лӱм верч «Pro Anglers League» всероссийский турнирыште таҥасаш тӱҥалыт.
Палдарыме семын ойлаш гын, «GRUNDENS PAL OPEN» турнир – тиде спиннинг дене пуш гыч хищный колым кучымаш. Тушто кок еҥан экипаж-влак гына таҥасат. Тудо кум кече шуйна.
И.Прохоров ден Е.Карчинский шке сеҥымашыштлан моткочак куаненыт. Молан манаш гын нуно турнирыш икымше гана ушненыт да вигак тыгай кӱкшытыш шуыныт. Эсогыл кугу опытан ятыр участникым ончылтен кертыныт!
«Ме тидым ыштенна! Ешлан, йолташна-влаклан да кӧмыт мемнан верч тургыжланеныт – чылаштлан кугу тау», – возен соцкыллаште Игнат Прохоров.
Л.Камалетдинова
