Оршанке район Кугу Ӧрша тӱҥ школышто марий йылме ден сылнымутым туныктышо Светлана Эриковна СЕМЁНОВА тыште икымше ий веле пашам ышта. Тудо ялысе школышто туныкташ эреак шонен. Шонымашыже шукталтын. Самырык специалист дене мутнам вашталтышна.
– Вузым тунем пытарымеке, паша верым муаш неле лийын огыл?
– Марий кугыжаныш университетыште вакансий ярмиҥга эртен, тушто мый Оршанке посёлкысо школын директоржо Ирина Витальевна Королёва да районысо Образований да самырык-влакын пашашт шотышто пӧлкам вуйлатыше Светлана Николаевна Мотовилова дене палыме лийынам. Нуно мылам паша верым темленыт. Тыге Оршанке посёлкысо школышто англичан йылмым кок ий туныктенам. Юмылан тау, шке специальностем денак тыршем, паша деч поснат шинчен омыл.
– Но вет кызыт вес предметым туныктет…
– Вузышто мый англичан-марий пӧлкаште шинчымашым погенам, сандене кок йылмыжат мылам лишыл. Кугу Ӧрша школышто марий йылме ден сылнымутым веле огыл, англичан йылмымат туныктем. Кок предметым наҥгайыме мыйым писырак лияш тарата, уш-акылем вияҥда.
– Икманаш, туныктышо лияш шонымаш вӱрышкет изинек шыҥен.
– Мый шкеже Морко район Ярансола ялын ӱдыржӧ улам. Кораксола школым тунем пытаренам. Педагог лияш мыйым икымше туныктышем Зинаида Александровна Емельянова, марий йылме ден сылнымутым туныктышо-влак Алевтина Петровна Юшкова ден Светлана Леонидовна Александрова кумылаҥденыт. Нуно шочмо йылмым йӧраташ, жаплаш, перегаш туныктеныт.
10-шо классыште тунеммем годым марий йылме дене районысо олимпиадыште икымше верыш лектынам. А регион кокласе олимпиадыште визымше лийынам. Район газетыште ойлымашем-влак икмыняр гана савыкталтыныт. Икманаш, кӧ лияш манын, шуко шонкален омыл.
– Школыштыда марий йылмым шочмо йылме семын туныктат але…?
– Марий йылмым шочмо йылме семын туныктена гынат, йоча-влак шукыж годым шке коклаштышт рушла мутланат. Тиде чоным туржеш да урокым вӱдымаште ятыр нелылыкым луктеш. Туге гынат вуйым ом саке, тунемше-шамычем предметлан кумылаҥдаш тыршем, тӱрлӧ оҥай методикым кучылтам. Жал, школышто интерактивный оҥа уке, тыгак урок жапыште интернетыш лектын огына керт. Садлан шукыж годым плакат-влакым сӱретлаш, картычке-влакым ыштылаш перна.
Но школышто марий йылмым шочмо йылме семын туныктымым арален кодымым сайлан шотлем. 5-8-ше класслаште марий йылмылан кок шагат ойыралтеш, а сылнымутлан – ик шагат. 9-ше классыште кажне предметлан ик шагат гыч пуалтеш. Тыгак ИКН урокат уло. Тудым историйым туныктышо вӱда. Директорна Сергей Алексеевич Кузьминыхлан таум гына ойлыман — йылмына, тӱвырана верч азаплана.
Чаманен каласыман, ешыште ача-ава икшыве дене шукыж годым рушла кутыра. Тидым мый школ пелен пашам ыштыше йочасадыш коштшо икшыве-влакын мутланымыштат шекланем. Чонем коржеш. Садлан мӧҥгыштӧ ӱдыр-эрге дене шочмо йылме дене мутланаш ӱжам!
Кумданрак — «Марий Эл» газетын
2018 ий 24 апрельыште лекше номерыштыже лудын кертыда.
Лидия ШАБДАРОВА.
М.Скобелевын фотожо.
