Марий Эл Образований да науко министерствын увертарымыж почеш, тиде кечылаште Йошкар-Оласе да Медведево районысо чыла школышто электрон книгагудо-шамыч пашам ышташ тӱҥалыныт.
Тиде – Марий Элын «Читать – здорово!» регионысо проектше «ЛитРес» Российысе электрон книгагудо дене пырля ыштыме паша. Тунемше-влак тудын фондыштыжо улшо книга-шамычым яра лудын кертыт. Тидлан шке школын электрон книгагудыштыжо регистрироватлалтман. Тунемме верын стендыштыже QR-кодым вераҥденыт, йоча тудым сканироватла, электрон билетым налеш да книгам ойырен кертеш. Тидым мобильный приложений полшымо денат ышташ лиеш.
Республикысе школлаште тыгай книгагудо-влакым почмаш – тунемме пашам уэмдымаште эше ик кӱлешан ошкыл. Но тунемше-влак тудым кузе кучылташ тӱҥалыт – икмыняр жап гыч тергат: лектыш куандарыше лиеш гын, электрон книгагудо-влакым республикын чыла общеобразовательный организацийыштыже почаш палемдыме.
