ОБРАЗОВАНИЙ ШКОЛ ЙОЛГОРНО

Йочан кумылжо – яндар кагаз

У тунемме тургым. Туныктышо, тунемше-шамычын илышышт вес йогыным налын. Тӱрлӧ предмет дене урок, тӱрлӧ теме дене кылдалтше мероприятий, таҥасымаш, конкурс… 

– Школышто чынжымак «шокшо» тургым тӱҥалын. Такшым тиде мыланна у огыл. Тидлан ме ончылгоч ямдылалтына. Кызыт   кажныже шке предмет дене шинчымашым пуаш тыршена, – ойла Звенигово районысо Кужмарий кыдалаш школ директорын алмаштышыже О.Орлова. – Таче кечылан школыштына 343 йоча тунемеш.  Тышке лишыл ялла гыч ӱдыр ден рвезе-влак коштыт. Мемнан дене общеобразовательный, музыкальный да спорт школ-влак пырля улыт.  Тӱҥалтыш класслаште творчестве дене кылдалтше  кружок-влак пашам ыштат. Мутлан, «Умелые ручки». Сӱретлашат тунемыт. Музыкальный школыш шӱдӧ утла ӱдыр-рвезе коштеш. Тушто хореографий уло, балалайке, кӱсле дене шокташ тунемыт. Тений шым выпускник гыч кажныже вузыш тунемаш пурен. ЕГЭ-ште южышт 90 баллымат погеныт. Индешымше классым 39 еҥ тунем лектын, луымшыш шым еҥ гына вончен. Молышт колледжыш, училищыш тунемаш пуреныт. Тидыже ЕГЭм сдатлыме денат кылдалтын, шонем. Спорт илышат гӱжла веле. Таҥасымашлаштат, олимпиадыштат вийым тергат. Ме Шкетан театр, «Марий Эл» ансамбль дене кылым ыштенна.

Зданий воктенсе кумдык мландеш пакчасаскам, пеледышым шындат. Тидыже школ кудывечыш пурымаштак шинчалан перныш: теве чевер, ал, нарынче тӱсан пеледыш-влак умбаке сылнын волгалтыт. 

Пакчаште тунемше-влак кольмо, ведра дене шогылтытат, воктекышт мийышна. Шымше «б» классыше тунемше ӱдыр ден рвезе-шамыч пареҥгым луктыт ыле. «Пареҥгыже тений тыгыдырак, начаррак гынат, садак лукман. Тидыже йоча-шамычым пашаште шуаралтын кушкаш полша. Шыжым да шошым ялозанлык дене кылдалтше урок уло», – мане технологийым туныктышо О.Карасева.

Кутырымо гыч пале лие: кеҥежым школ пеленсе лагерьышкат ӱдыр-рвезе-влак кумылын коштыт, участкыште пашам ыштат, модыт. Тушто жап веселан да пайдалын эрта.

Кумданрак — «Марий Эл» газетын
2017 ий 26 сентябрьыште лекше номерыштыже лудын кертыда.

 

Е.Эшкинина.

Опубликовать в Одноклассники

Добавить комментарий