Россий композитор-влак ушемын Марий Элысе пӧлкажым вуйлатыше, Россий искусствын сулло деятельже, композитор Валерий Кульшетов 17 октябрьыште 65 ияш лӱмгечыжым палемдыш.
Валерий Дмитриевичын марий искусствым вияҥдымаште надырже моткоч кугу. Композитор тӱрлӧ жанрыште пашам ышта. Тудо ятыр симфонийым, 200 утла мурылан семым возен, 400 утла мурылан аранжировкым ыштен, руш, марий спектакль-влаклан музыкым серен, да нуно тачат театрыш коштшо-влаклан лишыл улыт.
Тиддеч посна Валерий Кульшетов — йӧратыме да йӧратыше пелаш, поро кумылан ача.
Таче кечылан марий семмастарым мо тургыжландара? Тудын ешыже да марий эстраде нерген шонымашыжым тиде материалыште пален налаш лиеш.
— Валерий Дмитриевич, эн ончычак тендам юбилейда дене саламлена. Кужу ӱмырым, пеҥгыде тазалыкым тыланена.
— Пеш кугу тау. Шочмо кече, ийгот шотышто мый шонымашат уке. Мом ыштет: кажне ийын саламлыше-влак шижтаренак шогат (воштылеш). Паспорт почеш ийгот ешаралтеш гынат, тынар ийым йӧршын ом шиж. Йӧратыме икшывем-влак, пелашем пелен шкемым 25 ияш качымарийла шижам.
— Сулен налме канышыш лекмеке, кок гана ача лияш — тиде, мутат уке, пиал…
— Икшыве — Юмын шкешотан пӧлекше. Вет тыгай ошкылым ышташ кажныже огеш тошт. Ӱдыр-влак шочмеке, кумылем эреак йывыртыше. Пашаште ярсымеке, вик мӧҥгӧ вашкем, вет тушто мыйым чукаем-влак вучат. Нуно кызыт мыйым чылт магнит семын шкешт деке «шупшыт». Сандене икшыве пелен лияш, тудым кидыште нумалаш, оҥ пелен ӧндалаш — кугу пиал.
— Тиде шижмаш у пашам шочыкташат кумылаҥда, очыни?
— Икшыве — йӧратымашын саскаже. Куд ий ончыч Надюша дене икымше ӱдырна шочмеке, куанлан мучаш лийын огыл: чонем йывыртен, каласен моштыдымо шижмаш дене вӱдылалтын. Викториялан «Чукаем-шамычлан» мурым возенам ыле. Тудым «Чолга шӱдыр» конкурсышто Надюша мурен. Вараракше «Ӱдыремлан» муро шочо, тудат изи падырашланна пӧлеклалтын. Кокымшо ӱдырна, Мария, кандаш тылзе ончыч шочо. Тудын лӱмеш руш муро возалте. Тудо «Папа» маналтеш.
— Кокымшо гана пелашдан мӱшкыраҥмекыже, эргым вученда, докан?
— Лийын ыле тыгай ӱшан. Но… ӱдыр-влакат уда огытыл. Кызыт, нуным ончен, мый куанем, илем!
— Икымше пелашда да тудын деч шочшо икшывыда-влак дене кылым кучеда мо?
— Кок еш келшен илена, икте-весе деке унала коштына. Южгунам, йодмышт почеш, садышкыштат полшаш миен толам. Кугурак йоча-влак денат (Сергей 37 ияш, Марина 30 ияш — авт.) кыл уло. Кум уныкан коча улам. Чылан вашлиймеке, уныкам-влак да ӱдырем-шамыч пырля модыт, юарлат.
Кумданрак — «Марий Эл» газетын
2017 ий 17 октябрьыште лекше номерыштыже лудын кертыда.
Алевтина Байкова мутланен.
М.Скобелевын фотожо.
