Июнь – пеледыш тылзе. Пеледыш – мландышарыште эн мотор кушкыл. Арам огыл кеч-могай пайремыш але тыгайрак сынан вашлиймашке пеледыш аршаш дене каена. Лач пеледыш гоч икте-весе деке пагалымашым, йӧратымашым ончыктена, а южгунамже тудым пӧлекленак тауштен кертына.
Йолташ-влак, те могай пеледышым йӧратеда? Аршашыш могайжым чумыреда ыле? Пелашда могай пеледышым йӧрата?
Николай СМИРНОВ, Марий Эл культурын сулло пашаеҥже:
– Чыла пеледыш мотор, иктыжымат ойырен каласаш огеш лий: кеҥежым пасушто, олыкышто, а телым кӧршӧкыштӧ кушшо келша. Калыкыште тыге ойлымат шоктен: «Вис-вис – Николайын пеледышыже». Пелашемат чыла тӱрлӧ пеледышым йӧрата, но йӱла почеш, тудлан мый роза аршашым пӧлеклем.
Юрий СОЛОВЬЁВ, Марий Эл культурын сулло пашаеҥже, писатель:
– Ал розам моткочак йӧратем. Тудо нимучашдыме, ӱшанле да пеҥгыде йӧратымашым ончыкта, шонем. Тӱсшак тугай! Тудын пелен ласка, илымет шуэш. Нимыняр ом орло ош розам, тудат сылне!
Аркадий КУРОЧКИН, Технологий-влак сервис техникумын преподавательже:
–Хризантеме ден розам йӧратем, сандене тыгай пеледыш гычак аршашым пӧлеклаш тыршем.
Виктор АПТАЛИКОВ, мурызо:
– Гербер ден роза мыланем келшат. Пасушто да олыкышто пеледше-влакат моткоч сӧрал улыт. Тачысе саманыште, пеледыш – пеш шергакан пӧлек, садлан могайлан шийвундем сита, тугайым аршашыш чумырем. Тӱҥжӧ кугу да шаргакан пӧлек огыл, а – вниманий.
Михаил ВЕСЕЛОВ, мурызо, гармоньчо:
– Роза пеледышым веле йӧратем да аршашышкат тудымак чумырем. Роза чыла шот денат чапле пеледыш. Тудо ты тӱняште чылалан кугу куаным конда, йӧратымашым пеҥгыдемда, мужырым чоҥа, йоҥылышым тӧрла да куатым пуа. Кажне амаллан роза пеледышым пӧлеклем.
Саша ИВАНОВ, гармоньчо (Шернур район):
– Пеледыш манмыжак моторлыкым ончыктымо нерген ойла. Чылажат шинчам йымыктарыше да куандарыше, тӱням волгалтарыше. Кевытысе чапле роза дене таҥастараш гын, ончалза-ян изватышудым, шӧршудым. Нунын дене пидме вуйшӱдыш могай моторын коеш! Могай пеледыш дене эше тыгайым ышташ лиеш?! А розам йӧратыдыме еҥже укеат, шонем. Мемнан сад-пакчаштына шуко тӱрлӧ пеледыш кушкеш: циний, лаватера, бархатцы, сальвий, лилий, тюльпан.
Пеледышым пелашем веле огыл, шкеат пеш йӧратем, вет тудо йырваш улшо кумдыкым сӧрастара.
Лаштыкым А.БАЙКОВА ямдылен.
Фотом еш альбом гыч налме
