Республикнан лӱмжым нумалше кугыжаныш куштышо ансамбль марий кундемыштына веле огыл, йот эллаштат кумдан чапланен. Тудо ий еда тӱрлӧ вере гастроль дене лектеш. Ансамбльын пӧръеҥже-шамыч тавалтен колтымышт дене веле огыл, тӱрлӧ трюкым ыштымышт дене ӧрыктарат гын, ӱдыр-влак лывырге капкылан улмышт дене кумылым савырат. Мутат уке, шуко ий тыршымеке веле мастарлык шуаралтеш. Мутлан, «Марий Эл» ансамбльын солистше Наталья Чистякова коло наре ты коллективыште кушта.
Наташан ачаже Медведево районысо Елемучаш гыч, а аваже ты районак Пелешдӱр ялыште шочын-кушкын. Самырык мужыр, ешым чумырымеке, Йошкар-Олаш илаш куснен. Тыштак Наталья шочын.
Куштымашлан кунамрак шӱмаҥын, ансамбльыш тудо кузе логалын? Нине да моло йодышлан Наташа деч вашмутым нална.
— Наталья, куштымашлан кунамрак шӱмаҥынат?
— Мый изиэм годым капым лывыртен кадыргылаш йӧратенам. Йочасадыш коштмо годымак ача-авам Калинин лӱмеш культур полат пеленсе «Планета» ансамбльыш намиеныт. Пеш келшен. А школышто (19-ше номеран искусство школ) ачам музыкальный классыш пуэн. Тушто аккордеон дене шокташ тунемынам. Тиддеч вара Чайковский лӱмеш йоча искусство школыш кусненам. Тудым пытарымеке, Палантай лӱмеш культур да искусство колледжысе куштымаш отделенийыште тунемынам. Но туштат аккордеон дене шоктымым чарнен омыл.
— А колледжым тунем лекмеке, молан лачшымак «Марий Эл» ансамбльым ойырен налынат? Тушко логалаш неле лийын огыл?
— Колледжым 1998 ийыште тунем лекмеке, «Марий Эл» ансамбльын художественный вуйлатышыже Юрий Геннадьевич Иркабаев коллективыш ӱжын. Тиде ансамбльынак участницыже Нина Альбертовна Макарова колледжыште мемнам калык куштымашлан шӱмаҥден. Тудат тиде коллективыш ушнаш темлен. Мо оҥайже: искусство школышто тунемме годым икана «Марий Эл» ансамбльын гастрольышто лиймыж нерген уверым телевизор дене ужынам. Кузе тушко логалаш лиеш манын, семынем шоненам.
Эн ончыч практикым эртенам. Тунемме группо гыч шкет веле куштышо улам, а молышт педагоглан каеныт.
Коллективыш толмеке, умылен, порын вашлийыныт. Тӱҥалтыште педагог-влак Нина Альбертовна Макарован, Наталья Владимировна Смирнован, тыгак ансамбльын тале солистше Лариса Владимировна Ульянован пашаштым онченам.
— Икымше гана могай куштымашке шогалтеныт?
— Тунам Михаил Петрович Мурашкон лӱмгечыж вашеш кугу концертым ямдыленна. Нина Альбертовна чыла гаяк куштымашыш пуртен. А икымше гана гастрольыш 2001 ийыште Францийыш лектынам. Ик тылзе тиде элыште шагал огыл концертым ончыктымо. Эйфель башньым икымше гана ужмеке, шкемым пиаланлан шотленам. Тиддеч вара Испанийыште, Бельгийыште, Голландийыште, Португалийыште лийме. Сочишке миен толмат кужу жаплан шарнаш кодеш. Чылаштыжат шокшын вашлийыныт. Тусо калыклан мемнан вургемна пеш келша, эсогыл тувыр урвалтым кучен ончат.
— Пелашан, йочан лиймеке, гастрольыш лекташ нелылырак, очыни?
— Гастроль — тиде тугаяк паша, тольык икмыняр жап мӧҥгыштӧ огына лий. Тыгай годым пелашым ончылгоч шижтарем. Тудо умыла. Ӧрдыж кундемыш лектын коштмо дене тусо пӱртӱсым, вес калык-влакын илышыштым ужаш, нунын тӱвырашт, ыштыш-кучышышт дене палыме лияш йӧн уло. Но вес кундемыште кеч-мыняр мотор гынат, чон садак шочмо марий мландыш ӱжеш.
— Куштымаш — тиде паша але..?
— Куштымаш — эн ончычак йӧратыме паша, а варажым — йолташ-влак. Куштымаш ойгым мондаш, у кечым ӱшан дене вашлияш полша.
Алевтина Байкова мутланен.
