Рӱдола: теҥгече, таче, эрла
Изи сквер – у каныме вер
Йошкар-Олаште «2017 ийыште кызытсе олалан тӱсым пуртымаш» проект илышыш шыҥдаралташ тӱҥалын. Тудо мер колыштмашым, экспертизым эртен, сайлан шотлымо.
Рӱдолан мэрже Е.Маслов, тудо кузе шукталммым тергышыла, Воскресенский набережныйыште ышталтше изи скверыште паша кузе кайыме дене палыме лийын.
Ты изи лаштык мландыште постаментеш кече шагат-влакым вераҥдат, тыгак изи ужар алан мучко шинчаш теҥгыл ден шӱкшакым кышкаш урно-шамычым шындат. Эн кугу пашаже – кундемым тӱзаташ да ужарташ. Тидланже шуко вере пеледыш клумбым ышташ да пушеҥгым шындаш кӱлеш.
Подрядчик улшо «Деал» ООО-м вуйлатышын мутшо почеш, изи скверым август мучаштак почаш ямдылен шуктат. Тыге олаште илыше-влаклан канашышт эше ик мотор лук лиеш.
А.АНДРЕЕВ.
