Марий Эл вуйлатыше Александр Евстифеев кушкыжмын, 19 июньышто, Суд пристав-влакын федеральный службыжын знамяжым Марий Элысе региональный управленийлан кучыктымаште лийын. Тидлан пӧлеклалтше торжественный пайрем Э.Сапаев лӱмеш Марий кугыжаныш опер да балет театрыште эртен.
Республик вуйлатыше каласен:
— Тиде – кугу чап. Тудым коллектив сулен. Тылеч ончыч Дмитрий Васильевич дене ме управленийын паша лектышыжым каҥашенна. Россий Федерацийысе моло регион дене таҥастарымаште, суд пристав-влакын паша качествышт палынак сайрак. Тидын дене мый тендам саламлем. Тиде – кушкаш, умбакыже пашам ышташ ешартыш кумылаҥдымаш. Мый тыланда тӱрлӧ йӱлам ешараш да коллективым арален кодаш тыланем. Знамям кучыктымаш – тиде Россий президентын ӱшаным ончыктымашыже, тудым сулыман да аклыман.
Республик вуйлатыше коллективлан да службын ветеранже-влаклан тауштен ойлен.
ФССП директор – Россий Федерацийын тӱҥ суд приставше Дмитрий Аристов знамям Марий Элысе управлений вуйлатыше Анжела Эммануилидилан кучыктен. Тыгак Россий Федерацийын президентшын грамотшым лудын да тудланак пуэн.
Д.Аристов палемден: регионышто правопорядкым пенгыдемдаш Марий Элысе управлений чот полша. Суд пристав-влак Россий Федерацийын законодательствыжым пудыртышо 95 йот гражданым элын чек вес велкыже поктен колтеныт, тӱрлӧ преступленийым ыштымылан федеральный розыскышто улшо 245 еҥым кученыт.
Управленийын коллектившым тиде событий дене Марий Эл Республикыште Тӱҥ федеральный инспектор Петр Журавлев саламлен.
Тиде кечынак ойыртемалтше пашаеҥ-влаклан ведомствын медальжым, Чап грамотшым да Тауштымашыжым кучыктеныт.
Л.Камалетдинова.
