Элыштына неле чер дене кучедалме пагытыште «Не Иван, или как приручить Богатыря» фильмым войзышо группо шке пашажым умбакыже шуя.
Ушештарена, тений телым Марий Элын шочшыжо, самырык режиссёр да актер Денис Шаблий Онар марий патыр нерген кӱчык метражан фильмым войзаш шонен пыштен да пашалан кыртмен пижын.
Тидын нерген эше ик гана кӱчыкын ушештарена. Ийготыш шудымо рвезе Йыван рӱдолаште марий акцентшылан да шке ойыртемалтше лӱмжылан кӧра школышто умылыдымашым вашлиеш. Кувавайжын темлымыж почеш, марий калыклан йӧным ыштен шогышо Онар патыр деч полышым йодеш. Но неле годым патыр деч тудо нимогай полшыжымат ок шиж. Сандене Йыван шке лӱмжӧ дечат, калыкше дечат торла. Лач ты татыште Онарет тудлан конча да марий калыкын да шкенжынат – Йыванын — могай виян лийын кертмышт да улмышт нерген палдара.
«Шке фильм дене ме калыкнан кумылжым поро, еш дене ончаш лийме кино велке савырынена. Ийготыш шудымо икшыве-шамычым тугыжландарыше пӱсӧ йодыш-влакым, ача-ава дене ваш-кыл, икымше йӧратымаш нерген шонкалена. Американ супер герой-влак нерген тӱрлӧ американ блокбастер-влак шернам теменыт. Тидын годым ме шкенан элыштына илыше руш да тӱрлӧ моло тыгыде калык-влакын шкеныштын ойыртемалтше тӱвырашт улмо нерген йӧршеш монденна. Тиде мемнан голливуд комикс-влаклан вашмутна лиеш», — палемда режиссёр Денис Шаблий.
Кызыт тиде фильмым войзен шукташ манын, всероссийский компаний Planeta: https://planeta.ru/campaigns/neivan порталыште шийвундым погымо акцийым увертарен. 20 май марте кажне кумылан еҥ проектым илышыш шыҥдараш полшен кертеш. А тидлан сценарий да фильмын цифран копийже гыч тӱҥалын марий шӱлышан кидпаша марте шарнымашан пайдале сувенир-влакым налаш темлат. Шке фильмыштыжат эпизод рольым модаш йӧным пуат.
Фильмын сценарийжым Марий Элын Тӱвыра, савыктыш да калык паша шотышто министерствыштыжат сайлан шотеныт да полшаш ямде улмышт нерген увертареныт. Лӱмлӧ руш кинематографист-влак Владимир Хотиненко, Владимир Фенченко, Зоя Кудрят тиде пашаште полшаш сӧреныт. А Онарын рольжым Голливудыштат чапым налше, смешанный единоборство дене тӱнян чемпионжо, марий еҥ Олег Тактаров модаш келшен.
Тачысе кечылан проектым илышыш шыҥдарыше команде 80 тӱжем теҥгем поген. Но тидыже кӱлеш шийвундо деч пелыже наре гына. Самырык кинематографист-влак пеҥгыдын ӱшанат: тӱшка вий дене ты фильмым войзен шуктатак. Тунам марий калык, тудын талешкыже нерген мемнан элыште веле огыл, уло тӱня мучко палаш тӱҥалыт.
Проектлан полшаш кумылда лектеш гын, https://planeta.ru/campaigns/neivan ссылке дене лектын кертыда.
С.НОСОВА
Снимкыште: Денис Шаблий,
ончыкылык фильмын тӱҥ геройжым Олег Тактаров модаш келшен.
Фотом Денис Шаблийын социальный лаштыкше гыч налме
