Кызыт «Тазалык» национальный проектын регионысо шым проектше: «Первичный медико-санитарный полышым вияҥдымаш», «Шӱм-вӱргорно чер дене кучедалмаш», «Онкологий чер дене кучедалмаш», «Икшыве-шамычлан медицине полышым пуашлан, кызытсе жаплан келшыше инфраструктурым ыштен, йоча здравоохраненийым вияҥдыме программе», «Здравоохранений системын медицине организацийлашкыже квалифицироватлыме кадрым ситарымаш», «Здравоохраненийын единый кугыжаныш увер системыже негызеш единый цифровой контурым ыштымаш (ЕГИСЗ)» да «Медицине услугын экспортшым вияҥдымаш» – илышыш пурталтыт. Нунын цельышт 2024 ийлан вӱр коштмо чер деч колымо чотым 100 тӱжем еҥлан шотлымаште 527,4 гыч 430 случай марте, онкологий чер деч колымо чотым 100 тӱжем еҥлан шотлымаште 175,1 гыч 166,8 случай йотке да ик ияш марте йоча-влакын колымо чотыштым шочшо 1000 йочалан шотлымаште 4,6 гыч 3,9 случай марте иземдымашке виктаралтын.
Шернур районысо рӱдӧ эмлымверын тӱҥ врачшын алмаштышыже С.Куклинын мутшо почеш, 2019-2024 ийлаште ты кундемыште палемдыме шым проект гыч кудытшо шыҥдаралтеш.
Цифровой флюорографан да рентген маммографий цифровой аппаратан куснылшо медицине комплекс полшымо дене тений эмлымвер диагностике пашажым палынак вияҥден колтышаш. Тылеч посна калыкым медосмотр, диспансеризаций да диспансер эскерымаш дене кумданрак авалташлан куснылшо ик медицине комплексым (НМЦК) налаш палемдыме. Контрактын чумыр суммыжо 22 млн. 800 тӱжем теҥгеш шуын.
Шернур районысо рӱдӧ эмлымверын первичный вӱргорно отделенийышкыже кызытсе жаплан келшыше кӱкшӧ технологиян медицине оборудованийым вераҥдат: 2019 ийыште – УЗИ сканерым, 2021 ийыште – ангиографиян да КТ-перфузиян компьютер томографым, 2023 ийыште – шодышто искусственный вентиляцийым ыштыме 4 аппаратым да активно-пассивный механотерапийлан 1 аппаратым.
Эмлымверыште онкологий чер дене кучедалме шотышто 2021 ийыште Осал пуалшын тӱҥ видше-влакым комплексно да писын диагностироватлыме межрайонный рӱдерым почаш палемдыме.
Икшыве ден ача-ава-шамычлан сай да каньыле лийже манын, йоча поликлиникыште планировкым вашталтат. Тиде пашалан 2 млн. 700 тӱжем теҥгем кучылташ палемдыме. Йоча консультацийын медицине пашаеҥже-влак тений куснылшо УЗИ-м вучат.
Медицине пашаеҥ-влакым паша гыч кӱрылтде туныктымо системым умбакыже шыҥдарат. Тыгак профессиональный пашаш налме у процедурым – аккредитацийым – илышыш пуртат.
Проект дене келшышын, районысо эмлымверыш квалифицироватлыме врач ден кокла медицине персоналым пашаш толаш кумылаҥдат.
М.ИВАНОВА
