Шошо пасу пашам мучашлымеке, Параньгаште илыше да тушко унала толшо-влак иканаште кок пайремыште, Сабантуйышто да Пеледыш пайремыште, каненыт, жапым веселан эртареныт.
Тусо калыкым пайрем дене саламлаш Марий Эл вуйлатыше Александр Евстифеев да правительстве еҥ-влак миеныт.
Уна-влакым кинде-шинчал, татар калыкын тутло кочкышыжо — чак-чак да марий-влакын ямдылыме команмелнашт дене вашлийыныт.
— Мланде пашаште тыршыше-влаклан йӱр — тиде куан, а шошо пасу пашам мучашлымым пайремлыме годым тудо йӱреш гын, тугеже тений шурно сай лектышан лиеш, — манын А.Евстифеев.
Регион вуйлатышын палемдымыж почеш, пайрем-влак шке мландым йӧраташ, кугезына-влакын йӱлаштым аралаш, тудым самырык тукымлан шуяш да икте-весе дене келшен илаш да поро кумылан лияш туныкта.
Пайремыш чумыргышо-влак тӱрлӧ модмашке, конкурслашке ушненыт, поснак эн талыже-шамыч татар-башкир кучедалмаште (курэш) чолгалыкым ончыктеныт.
Молгунамсе семынак Сабантуйышто имне дене таҥасымашым изижге-кугужге куанен вучат. Марий Эл вуйлатыше да пайремыш толшо моло почетан уна-влак тудым тӱткын эскереныт.
Марий Элым вуйлатышын организаций да аналитике виктемжын уверже негызеш А.Байкова ямдылен
