УВЕР ЙОГЫН

Нунак тУНалыныт, нунак мучашленыт

Волжский район Памар ден Морко район Коркатово корно участкын ик ужашыштыже, рашынже Отымбал ял велке савыртыш тураште, вӱдым колтышо тоштемше пучым вашталтыме паша тидлан вуйын шогышо организаций-влакын тенийсе планышкышт пурталтын ыле. Амалжат лийын: тыште корно, автомашиналан кудал эрташ лӱдыкшым ыштен, сайынак волен шинчын. Пеленак изирак ер семын погынышо вӱд жапын-жапын ташлен, пуч йыр урымо мландым эркын мушкын.

Ты кундемыште лийме годым пашазе-влакын корныш тыгыде кӱм шарен тӧрлымыштым ужна да асфальтым пышташ ямдылалтмыштым тогдайышна.

— Тошто пуч йыр мландым кораҥдыме пашам мемнан организаций, «Марий Эл Дорстрой» АО-н Волжскысо филиалжын Звенигово участкыже шуктен, а у пучым «Мостремстрой» кугыжаныш унитарный предпритяийын пашазыже-влак «пыштеныт, — каласкала филиалын самырык прорабше А.Уткин. – А умбакыже пашам уэш меак шуктенна. Корно полотном нӧлталынна, кӱртньӧ-бетон плита-влакым оптенна. Теве таче чыла пашам мучашлаш шонена.

Мемнан эртен кудалме кечылан корным мучаш марте тӧрлаш чылажат ямде лийын. Пашазе-влак асфальтым шарыме деч ончыч лучко метр кужытан участкыш тыгыде кӱм шарен шуктеныт. Тудым, мемнан шинчаончылнак технике дене тӧремден, асфальтым шараш ямдыленыт.

— Мӧҥгеш савырнен толмыда годым у асфальт дене кудал эртеда,- каласыш А. Уткин. – А пучым вашталтыме жаплан пелен ыштыме корным лишыл жапыште кораҥдена.

Чынжымак, мӧҥгеш пӧртылмӧ годым олмыктымо корно участкым кузе эртен кудалмынамат ышнат шиж. Тидын нерген икмыняр уштышым эртымеке веле тогдайышна. Пашазе-влаклан кажныже ушыштына таум каласышна.

А.АНДРЕЕВ.

Снимкылаште: пашазе-влак корным тӧрлымӧ пашам мучашке шуктат; (0073 але 0074) прораб А.Уткин дорожник-влак дене мутлана. (0078)

Авторын фотожо.

Опубликовать в Одноклассники

Добавить комментарий