Михаил СКОБЕЛЕВ
Звениговышто ятыр гана лийынам гынат, оласе набережный дене, Бутяков лӱмеш завод гыч тӱҥалын маяк марте икымше гана эрташ логале. Эҥер сер дене ошкылмо годым Звениговышто илыше-влакын кундемыштым йӧратымышт шижалтын. Нуно икмыняр ий ончыч тӱзатыме набережныйыште келанен каналтеныт.
Мыят Юл эҥерын моторлыкшым ончен, пӱнчӧ южым шӱлалтен маяк деке корнем такыртышым. Шинчамлан ротонда перныш. Олан гербшым тушто ик тӱсан чия дене чиялтыме. Шке семынем шоналтышым: «Гербшым тӱрлӧ тӱсаным ышташ гын, сӧралрак коеш ыле».
Звенигово Юл воктене шинча, сандене чыла вере гаяк вӱд дене кылдалтше арт-объект-влак вашлиялтыт: рынде, якорь, корабльын ужашыже-шамыч. Шокшо игечыште шере мороженыйым тамлаш, йӱштӧ вӱдым подылаш лиеш. Тидыжым лӱмын келыштарыме автомобильыште ужалат.
Пляж кугу огыл, но калык ятыр коеш, икте капшым кӱктен кия, весе йӱштылеш. Эсогыл Казань гыч спортсмен-шамыч Звенигово набережныйыш каналташ толыныт. Нуно верысе «Жемчужина» спорткомплексыште грек-рим кучедалмаш дене тренироватлалтыт. Сеҥымашын 60-шо идалыкше лӱмеш оласе тӱвыра да каныме полат ончылно моткоч чатката да ару. Воктене йӧнан теҥгыл-влак улыт, йоча-шамычлан модмо площадкымат келыштарыме.
– Ужамат, те фотограф улыда. Тыланда йӧратыме верем ончыктынем. Мылам набережный дене кошташ моткоч келша. Шкеже Какшамарий села гыч улам. Звениговыш 1975 ийыште пашам ышташ толынам. Вара армийыш каенам, тышкак пӧртылынам, молан манаш гын тиде кундем мылам лишыл. Вара ешым чумыренам. Икшывына-влак кушкыныт, вес кундемлаш чоҥештен каеныт. Туге гынамт мемнам огыт мондо, жап лийме семын унала толын каят, – каласыш шукерте огыл палыме Николай.
Тудын дене йӧратыме куэже-влакым ончална. Чынжымак, пушеҥге-влак ойыртемалтше улыт. Визытын пырля кушкын шогалыныт. Пӧръеҥ нуным вич акак-шӱжарак манын лӱмден. Парк деч вара Юл затоныш волышым, маяк деке лишемым, катер-влакын кудал эртымыштым эскерышым да мӧҥгеш олаш тарванышым.
Михаил Скобелевын фотожо.
