КУЧЕМЫШТЕ

ЖКХ ДЕНЕ КЫЛДАЛТЫН

2023 ийыште Марий Элыште шуко пачеран 72 пӧртым капитально олмыктат.

Ачалаш палемдыме чумыр кумдык 214 тӱжем квадрат метрыш погына, пашан акше – 573,59 миллион теҥгеш. Чыла объектлан проект-смете документаций ямде.

4 майыште Марий Элым вуйлатыше Юрий Зайцев Россий Федерацийыште региональный вияҥмаш шотышто правительственный комиссийын президиумжын штабшын заседанийыштыже участвоватлен. Тушто 2022-2023 ийлаште субъектлаште шуко пачеран пӧрт-влакым капитально олмыктымо да граждан-шамычым аварийный илыме верла гыч кусарыме региональный программе-влакым илышыш пуртымо нерген мутланеныт. Заседанийым Россий правительстве председательын алмаштышыже Марат Хуснуллин вӱден.

Вице-премьерын палемдымыж гыч, таче илыме вер да коммунал озанлык аланыште эше шуко пӱсӧ йодыш уло.

– ЖКХ аланыште финансированийын ситыдымыже, инфраструктурын чот тоштеммыже, сетьлам варашрак кодын вашталтыме сӱрет палдырна. Тиде сфер кажне россиянин дене кылдалтын, чыла фактор граждан-шамычын илыш качествыштлан мутым куча, – манын тудо.

Марий Элыште капремонт шотышто программым 2014-2049 ийлан ыштыме, тудым кумияш 12 йыжыҥлан шеледыме. Тушко шуко пачеран 4 тӱжем утла пӧртым пуртымо. Ӱмаште 83 пӧртым олмыктымо.

Граждан-влакым аварийный илыме фонд гыч кусарыме  республиканский адресный программын кышкарыштыже тений 646,30 миллион теҥгем кучылташ палемдыме. Муниципальный образований-влакын верысе шкекучем органлашт дене 371 контрактым ыштыме, нунын суммышт 486,76 миллион теҥгеш погына.

Программе-влакым илышыш пуртымо шырымым Ю.Зайцев шке эскера.

Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен

Опубликовать в Одноклассники

Добавить комментарий