Эртыше кечылаште Всероссийский кугыжаныш теле-радиокомпанийын «Марий Эл» ГТРК- аштыже кызытсе жаплан келшыше у студийым пашаш колтеныт.
Регион вуйлатыше Юрий Зайцев у инновационный технологиий проектым шке аклен. Уэмдыме деч вара студий йӧршеш вес сыным налын: декораций тӱрыс вашталтын. Тудо ынде светодиодан 25 экран да кугу разрешениян кок видеопырдыж гыч шога. Пырдыжышкыже тӱрлӧ видеосӱретым вераҥдаш лиеш. Тыгай комплект кызытсе жаплан келшыше телевизионный контентым ыштыме пашалан келыштаралтын: ик кнопкым темдалын, кумдыкын сынжым вашталташ лиеш, уло студийжак виртуальный сыным налеш.
Тачысе илышыште лийше событий-влакым тичмашын ончыкташ манын, Марий Эл вуйлатыше кучем орган-влак ден ТУЙ-ын (СМИ) сай вашкылышт лийым пеҥгыдемден да теле-радиокомпанийын коллектившым у студийым пашаш колтымо дене саламлен.
«Тиде кугу событий. Мый кажне эрым «Россия 1», «Россия 24» канал-влакын уверыштым ончымо дене тӱҥалам, тушто мемнан республикын илышыже нерген сюжет-влак эре лектын шогат», – каласен Юрий Зайцев.
Вашлиймаш годым ВГТРК холдингын генеральный директоржо Рифат Сабитов видеосвязь гоч регион вуйлатыше-влакым саламлен: «Тиде студий элыштынат ик эн сай лиеш, молан манаш гын тудым у технологий дене пойдарыме. Поснак тау мутым ВГТРК-н генеральный директоржо Олег Борисович Добродеевлан да Марий Эл вуйлатыше Юрий Викторович Зайцевлан каласынем».
Уэмдыме студийын у видеопырдыжше воктене регион вуйлатыше дене интервьюмат возен онченыт. Мероприятийын финалыштыже, телевизионщик-влакын йӱлашт почеш, ончыкыжым паша ушныжо манын, керамике тарелкам шалатеныт.
Марий Эл вуйлатышын пресс-службыжын уверже негызеш Светлана Носова ямдылен
