Жап дене тӧр ошкылман
Тачысе унана – Марий Турек посёлкысо Эҥерымбал ялыште илыше кидмастар Сергей Беленков.
Шке жапыштыже тудо Йошкар-Оласе совхоз-техникумым тунем пытарен верысе Ленин лӱмеш колхозышто механиклан да тӱрлӧ специальность дене пашам ыштен.
– Бригадым чумыренна да кормоцехлам олмыктенна, фермылаште техникым ачаленна, – ойла Сергей Петрович. – Вара мыйым верысе СПТУ-ш производство мастерлан кусареныт. Тушто слесарный кабинетыште рвезе-влак дене кӱртньӧ дене кидпашам ыштенна. Тунам неле, оксадыме пагыт лийын:ны сай материал, ны шотан ӱзгар. Тыге, сатунам ужален, окса дене келшыше материалым, ӱзгарым налынна.
– Нылле утла механик ден трактористым туныктен луктынна, – умбакыже ойла Сергей Петрович. – Тунемше-влак жапыштым пайдалын эртарышт манын тыршенна.
СПТУ гыч кайымеке, тудо сад-пакчалан йӧршӧ кӱртньӧ ӱзгарым да молым ыштен, амалкалче семын тыршен, а кызыт – сулен налме канышыште.
– Ялысе калыклан мом гына ыштен огынал: омса йолым, шорвондым, мландым пушкыдемдыме ӱзгарым, кольмым… Тунам, перестройко годым, кевытлаште нимогай сатужат лийын огыл. Вара кӱртньӧ омсам, сурт ден капка авыртышым, теплицым да молым ышташ пижынна. Илен-толын калыкын оксаже ешаралтын… Кызыт йодмо почеш, оҥайракым, таптыме чапле капкам, сылнештарыме омсам ыштена. Сай сатум ямдылаш кӱртньӧ калайым тодмо, кӱртньым пӱчкаш йӧршӧ станоклам налынна. Нуныжо тачысе кечылан келшыше, у технологий почеш ыштыме улыт. Жап дене тӧр ошкылман. Теве капкаште таптыме лышташ-влакым шкеак ыштенна. Южо материалжым ямдым налынна. Тыге сай озалан чапле изигапка лектеш, шкенанымат уэмденна. Ужыда, икымше пашана могай лийын!
Тыге манмеке, суртоза тошто клатын пырдыжыштыже пижыктыме авыртыш-влак велыш ончыктыш.
– Кызыт ончыкылыклан йӧршӧ пашаеҥ-влакым кычалман, – шонкала кидмастар. – Айдемым тидлан тунам туныкташ лиеш, кунам тудын кумылжо уло, ты сомыллан кид-йолжо келшен толеш. Пашамым умбакыже Константин эргым, институтым тунемын пытарымекыже, шуя. Рвезе еҥын технике деке интересше лийшаш. Ондак мом ыштенна? Писынрак ужалаш йӧршӧ ӱзгарым. Тунам кидпашана проста да шулдо лийын. А кызыт мемнан мастарлыкна кушкын манаш лиеш, Йошкар-Ола ден Озаҥ олала гыч йодшо-влак улыт. Посёлкыштат мемнам чылан палат.
Беленковмыт у кугу капкам (кок могырыш почылтеш) да изим поген шынденыт. Кугужым эше ыштен пытараш кӱлеш.
– Мутлан, татар-влак оралтыштым ыштыме годым шӧртньӧ да ужар тӱсым кучылтыт – тидымат палыман, – умылтара Сергей Петрович. – Умбачын сӧралын коеш. Шканна таптен ыштыме кӱртньӧ балконым, лӱҥгалтышым ыштенна.
Тыгай оҥай кидмастар еш дене кугешнаш веле кодеш.
М.СКОБЕЛЕВ
Авторын фотожо.