Республикысе изосымыктыш тоштерыште пошкудо Татарстан Республикысе Зеленодольск олалан 90 темме лӱмеш «Почылтшо серыш» («Открытое письмо») ончер чумыралтын.
Выставкыште Россий художник ушемын членже, Российысе художество академийын дипломантше, Татарстан Республик сымыктышын сулло пашаеҥже Анатолий Крыловын, Зеленодольск ола гыч «Татарстан Республикын калык художникше» лӱм дене икымше палемдалтше Фарит Валиуллинын, илыш гыч кайыше Туктар Мухамадеевын, Зеленодольск йоча художественный школын преподавательже-влак Валерий Макаровын, Евгений Уткинын, Рушан Хисамовын радынаже-влак ончыкталтыт. Ты школынак директоржо, Репин лӱмеш художество академийын (Санкт-Петербург) выпускникше Сергей Царев «Руш йӱдвел» серийжым темлен.
Пӧръеҥ-влак коклаште ик ӱдырамаш, тиде – Татарстан Республик культурын сулло пашаеҥже, Российын да Татарстанын художник ушемын членже Диля Барышева. Тудын батикше акварель, пастель, график, витраж, мозаике гыч ыштыме – чыла иктеш ушен, тугай сӧраллыкым мыланна пӧлекла, ала-мыняр шагат ончет гынат, шерет ок тем.
Л.СЕМЕНОВА
Фотом Марий Эл Республикысе изосымыктыш тоштерын ВК тӱшкаж гыч налме
