20 февральыште Марий Эл Республикын Общественный палатыжын иктешлымашан заседанийже эртыш. Тушко регион вуйлатыше Александр Евстифеев толын ыле.
Тӱҥалтыште Общественный палатын идалык жапыште шуктымо пашаж нерген докладым вуйлатышын сомылжым шуктышо Герман Дементьев ыштыш. Республикын Общественный палатыже 9 ий пашам ышта. Тиде жапыште ты орган регионысо ятыр мер ушемлан келшен пашам ышташ кӱлешан площадкыш савырнымыжым палемдыш. Тыгак палатыште 4 комиссий улмо нерген ойлыш, поснак чолган тыршыше-влакым каласен кодыш. Еҥ-влакын палатыш могай йодыш-влак дене толмышт нергенат палдарыш.
Умбакыже Марий Эл вуйлатыше ойлыш. Тудо республикын Общественный палатыже – тиде мер эскерымашым шуктышо, пашам лектыш дене ыштыше орган манын палемдыш. Александр Евстифеев палатын енже-влакын ончыкшым шуктышаш пашаштын икмыняр шӧрынжӧ нерген ойлыш. Тыгодым ЖКХ сферылан тӱткышым поснак ойырыш:
— Кодшо арнян ме Волжскышто аварийым кораҥдышна. Тидым писын ыштыме. Республикыште уда корно лийшаш огыл. Но йӧршынат чыташ огеш лий, кунам чыла сеть-влак ик жапыште шот гыч лектыт.
А.Евстифеев профильный ведомство-влаклан экспертизым эртараш да посна илемлаште сетевой озанлык-влак могай состоянийыште улмо шотышто иктешлымашым ыштен пуаш йодмыж нерген каласыш. Тыгак Общественный палатын енже-влакын пашашт общественный кумдыкым да кудывече-влакым «Ола кумдыкым тӱзатымаш» проектым илышыш шыҥдарыме дене келшышын шуктымаштат кӱлешан улмым палемдыш.
Александр Евстифеев муниципал образований-влакын вуйлатышышт дене умбакыжат келшен пашам ышташ да контроль-надзор паша реформым илышыш шыҥдарымашке чолган ушнаш темлыш.
Кадр резерв тачысе кечылан регионышто ик сферыштат уке манын ойлыш да тидланат кугу тӱткышым ойыраш кӱлмӧ нерген каласыш.
Палатын еҥже-влакын сайлымаш паша кузе кайымым тергыме мер эскерымашкат ушнаш кӱлмым палемдыш.
Заседанийыште тыгак Марий Эл Республикын Кугыжаныш Погынжын председательжын алмаштышыже, республикын профсоюз организаций-влак ушем председатель Ольга Цветкова ойлыш. Тудо гражданский обществе институт-влак системыште Общественный палатын кӱлешан верым айлымыж нерген каалсыш.
Любовь Камалетдинова.
