Теҥгече кечывал деч вара Йошкар-Оласе Ий полат воктене микроавтобус сынан икмыняр машина шогымым ужым. Иктыже йошкар тӱсан минивэн ылят, шинчашке вигак перныш. Тӱсленрак ончальым гын, тушто шола велныже «Папаши» манын кугу возен шындымым ужым. А ӱлныракше изиракын серыме. Тӱрысшӧ тыге возымо: «Папаши» в деле. С детьми». Оҥай, шоналтышым семынем.
Мӧҥгышкӧ мийымеке, телевизорым чӱктышым гын, ончем: лач ты верыштак да «Папаши» ден воктеныже шогышо моло машинам ончыктат!
Тиде автопутешественник ден караванер-шамыч улыт улмаш. Нуно Россий мучко шке машинашт дене кудалыштын, сӧрал вершӧрлам ончен савырнаш лектыныт. Ончыктымо сюжет гыч рашеме: чынак, пеленышт южышт икшывыштымат налыныт. Эсогыл пийыштым! Машина кӧргыштышт иктыштын малаш верым гына келыштарыме, а весыштын транспортышт – изирак пачер гай: малыме вер деч посна эше кочкаш шолташ плитке, вӱд, кран уло. Могай йӧнан! Чечняшке кайыме годым корнышто мемнам ик тыгай машина эртен кайыш. Да кушеч ыле?! Марий Эл гыч! Вет номерже воктене «12» возымо лийын, а тыге гын, мемнан регион гыч. Тора кундемыште шке кундем гыч машинам ужмылан моткоч куаненна ыле. Эшежым икмыняр километрым пуйто модна: я ме микроавтобус дене эртен кайышна, я тудо, вара адакат ме…
Вӱргечын Йошкар-Олаште Ий полат кумдыкышто шогышо машина-влак коклаште ала тудат лийын? Вет автопутешественник-шамычын тӱшкашт деке кумылан-влак тӱрлӧ ола ден илемлаште ушнат.
Таче нуно, мутлан, Козьмодемьянскыш каеныт. Тушто Кава йымалсе этнографий тоштерыште чумыргат. Республикысе Спорт да туризм министерствын палдарымыж почеш, тушто регион-влак кокласе конференцийыш ушнат да автотурист кластер-влакым, корно инфраструктурым вияҥдыме шотышто йодыш-шамычым каҥашат, Юл эҥер мучко да Юл кундемысе федеральный округышто моло направлений дене эше могай у маршрутым почаш лийме нерген мутланат.
Чыла тиде мыняр сайрак лиеш, тунар элыштына автотуризмат вияҥеш да кумда Российнан сылне кундемлашкыже шке машина дене лектын кошташ йӧнанрак лиеш. Адакшым «Туризм и индустрия гостеприимства» нацпроектат лач тидланак виктаралтын.
Любовь Камалетдинова
Авторын фотожо