Марий Элым вуйлатыше шефствыш налме Куйбышев район шотышто лач тыге палемден.
Тиде кечылаште республикышкына паша дене Куйбышев округысо депутат-влак советын да Запорожье областьысе Молодёжь парламентын депутатше-шамыч толыныт. Нуно регионым вуйлатыше Юрий Зайцев дене вашлийыныт. Юрий Викторович каласен:
« Куйбышев район дене вашкылым кок ий кучена. Тиде жапыште ыштыме ойпидыш деч посна у темлымашна-шамычат улыт. Пӱсӧ йодыш-влакым решатлыме шотышто пуымо обязательствына полышна деч палынак кумда. Президент мыланна тиде кундемым ӱшанен пуэн, ме тудлан полшаш ямде улына».
Вашлиймаш годым Марий Элым вуйлатышылан Куйбышев районышто верланыше йочасад шотышто ойленыт: тудын икмыняр ужашыже лӱӥкалымылан кӧра шаланен. Юрий Викторович социальный объектым олмыктымо шотышто пашам организоватлаш кӱштен.
Ушештарена, Марий Эл шефствыш налме кундемлан 2023 ий гыч полша. Республикнам вуйлатыше Запорожье областьыш миен коштын. Российын у регионлашкыже республикна гыч гуманитар грузым, коммунальный техникым колтат, тыгак социальный объектлаште олмыктымо пашам шуктат. 2024 ийыште гына йочасад ден школ-влакым, аптеке пунктлам, тыгак шуко функциян рӱдерын оралтыжым ачалыме, вӱдым пуымо системым шотыш кондымо.
Делегаций Марий Элыш икмыняр кечылан толын. Уна-влаклан республикнан рӱдолажым веле огыл, тыгак районласе ик эн тӱҥ объектла (школ, храм, тоштер, тӱвыра порт да моло) дене палдараш палемдыме.
Марий Элым вуйлатышын пресс-службыжын уверже негызеш Галина Кожевникова ямдылен
Денис Речкинын фотожо
