КУЧЕМ УВЕР КУЧЕМЫШТЕ УВЕР ЙОГЫН

Юрий ЗАЙЦЕВ: «Мо ышталтмым йомдараш огыл, мом тӱҥалме –  умбакыже шуяш…»

10 майыште Марий Эл правительствын интернет-порталыштыже да шкенжын телеграм-каналыштыже Александр Евстифеев «Марий Эл Республикым вуйлатышын полномочий жапше эртыме дене мый Россий президент деке отставкыш колташ йодмашым пуэнам» манын увертарен. Шке кумылын отставкыш кайыме нерген увер шукыштлан вучыдымо лийын гынат, кас велеш чыла рашемын. А.А.Евстифеевым отставкыш колтымо да тудын олмеш Марий Эл вуйлатышын обязанностьшым жаплан шуктышылан Юрий Викторович Зайцевым шогалтыме нерген 2022 ий 10 майыште 282-шо номеран указ лектын, Владимир Путин тушан шке кидпалыжым пыштен.

Каласыман, Россий президент ты кечынак эше ныл регионын: Киров, Рязань, Саратов да Томск областьлан – вуйлатышыже-влакым вашталтен, тидын нерген указ-влакым Кремльын офиицальный сайтыштыже вераҥдыме. Жаплан шогалтыме губернатор-влакын лӱмыштат тунамак пале лийыныт. Владимир Путин кажныж дене кылым ыштен, ончыкылык паша нерген мутланен. Марий кундемын вуйлатышыжын обязанностьшым жаплан шукташ шогалтыме Юрий Зайцев дене вашлиймаш видеоконференц кыл полшымо дене эртен.

11 майыште Юл кундем федерал округышто РФ президентын полномочный представительже Игорь Комаров Йошкар-Оласе Конгресс полатыште Марий Эл правительствын членже, власть кучемын федерал органлаштыже ыштыше, районысо  муниципал образований вуйлатыше, Кугыжаныш погынын депутатше да журналист-влакым Юрий Зайцев дене официально палымым ыштыш. «Тендан шинчымашда, кугыжаныш вуйлатыме пашаште погымо опытда да профессионализмда, Юрий Викторович, республикын социальный илышыжым да экономикыжым вияҥдаш полшат манын ӱшанем», – саламлышыжла каласен тудо. Пытартыш вич ий жапыште республикыштына ышталтше паша нерген ойлымыжо Александр Евстифеевын вуйлатыме сомылжылан акым пуымо дене иктак лие.

– Регионышто оборонно-промышленный комплексын предприятийже-влак пашам ыштат, ялозанлык, IT-индустрий вияҥыт. Социальный сферыште сай могырыш вашталтыш-влак шижалтыт. Школ, тӱвыра пӧрт-влакым чоҥат, кудыжым уэмдат, «ондалалтше дольщик-влакын» пӱсӧ йодышыштым йӧршынлан кораҥдыме. Йошкар-Олаште перинатал рӱдерын кӱкшӧ технологиян корпусшым пашаш колтымо, Волжскышто азам ыштыме пӧрт чоҥалтеш. 17 ФАП-ым почмо, вашке полыш паркыш у машина-влак ешаралтыныт. Транспорт инфраструктурым саемдыме, самолёт-влак уэш чоҥештылаш тӱҥалыныт.

Марий Эл – Юл кундемыште яндар экологиян ик эн мотор вер, тыште тӱрлӧ калык ик ой дене келшен ила, шкешотан ойыртемалтше культурыштым аралат. Тыште талантан да пашам йӧратыше калык ила, – палемдыш полпред.

Марий Эл вуйлатышын обязанностьшым жаплан шуктышо Юрий Зайцев эн тӱҥ корным палемдымыж нерген каласыш, тиде – республикысе калыкын илышыжым саемдымаш, национальный проект да кугыжаныш программе-влакым 100 %-лан шуктымаш. «Пагалыме коллеге-влак, пагалыме йолташ-влак! Чыла, мом шонен пыштыме да ышташ тӱҥалме, вашкерак илышыш пурыжо манын, мый тендам пырля лияш, тӱрлӧ велым полышым да эҥертышым пуаш йодам. Мый Александр Александровичлан таум каласынем. Тендан ыштыме паша лектышдам шымлен лектынам, сеҥымашке шумыда куандара. Мемнан задачына: мо ышталтмым йомдараш огыл, мом тӱҥалме – умбакыже шуяш да мом эше ышташ кӱлеш – тудым ышташ. Марий Элым тӱзландарышаш верч тыршаш ямде улам. Мый ответственностьым шижам, республике умбакыжат виҥже манын, уло виемым пышташ товатлем».

Мутым налмекше, Александр Александрович 5 ий ончыч ты трибун ончылно шогымыжымат шарналтыш, «Марий Эл Республикын вуйлатышыже лияш мыланем кугу честь да ответственность лийын» манын палемдыш, Россий президент Владимир Путинлан тауштен каласыш.

– Те да республикат мыйын верч нигунам намысыш огыда пуро. Тыште улмо ийлаште мый шкемым эреак ответственно кученам. Ме пырля тыршенна, пеш шуко ыштенна. Ыштыме пашана нерген формальный отчётым, цифр дене пеҥгыдемден, чумыр калык ончыко луктынна. Мый чыла политический партий-влаклан тауштем, ме икте-весылан полшенна, сеҥымашке шуынна. Республикылан вияҥашыже Россий президент кугун полша, ме чыланат тудлан тауштена. Марий Эл умбакыжат тыгак писын сай могырыш вашталтеш манме шонымаште нимыняр кокытеланымашем уке, сандене улшо задаче-влакым илышыш шыҥдарымаште Юрий Викторовичым поддержатлаш йодам,– тиде, очыни, чеверласыме ойжо лие. Залыште шинчыше-влакын, кынел шогалын, ятыр жап совым кырымышт изишак кумылым волтыш. Мом ыштет, ойырлымаш кеч-кунамат шӱлык сынан.

Журналист-влак дене посна вашлиймышт годым полпред Комаров каласыш: «Юрий Викторович кум ий Калмыкийын правительствыжын председательже лийын, санденат регион дене вуйлатыме опытшо кугу. Шкенжын выступленийыштыже тудо эн ондак еҥ-влакын проблемыштым шинчаончылно кучымо, калык дене кылым ыштыме нерген ойлыш. Кызытсе саманыште тыгак промышленность да бизнес йодышымат шӱкалман огыл, вет паша верым арален кодымо, еҥ-влакын доходыштым кугемдыме йодыш-влакат пӱсын шогат».

Юрий Зайцев икмыняр йодышлан вашештымыж годым трибун гыч каласыме мутшым эше ик гана пеҥгыдемден мане: «Тӱҥ паша – проста калыкын илышыжым саемдыше социально-экономике вияҥме корным ойырыман».

Официальный представлений деч вара Правительстве пӧртыштӧ Юл кундем федерал округышто РФ президентын полномочный представительже Игорь Комаров, Марий кундемын вуйлатышыжын обязанностьшым жаплан шукташ шогалтыме Юрий Зайцев да регионын ынде ончычсо вуйлатышыже Александр Евстифеев вашлийыныт. Нуно республикын социально-экономике вияҥмаш шотышто ончыкылык паша планым да мер-политикыште улшо икмыняр пӱсӧ йодышым каҥашеныт.

Л.СЕМЕНОВА

Д. Речкинын фотожо

 

Опубликовать в Одноклассники

Добавить комментарий